LAMKAMPIES VERHOOG PRODUKTIWITEIT

Die lamkamp-en-hokstelsel van die Eksteens van Piketberg werk uitstekend – en ná drie jaar sien hulle die voordele in ’n 25%-verhoging in lampersentasie en gesonde, eenvormige lammers. Die pa-en-seun-span, Bertus en Francois, wou hul Vleismerinovertakking op hul plase Witvlei en Die Helfte meer produktief maak.

’n Stelsel van permanente kampies, waarin ooie op die plaaswerf lam, is ná hulp van die Bredasdorpse landbou-ekonoom en veevoedingkundige, mnr. André Fourie, opgerig.

Danksy Google Earth Pro kon Bertus maklik die gebied met die ideale helling identifiseer, opmetings doen en bepaal hoe die waterpype moet loop. Daar is 14 kampies, met gemiddelde afmetings van 16,6 m x 58 m en ’n oppervlak van 0,1 hektaar, aan elke kant van ’n pad wat 8 m breed is. Die uitleg van die krippies, lekbakke en plekke waar die ruvoer uitgesit word, is só gedoen dat die skape nie net aan een kant van die kamp loop nie. Gedurende lamtyd word 80 verskuifbare lamhokkies in die middelste twee kampe langs mekaar gerangskik om meerlingooie tydelik te huisves. Elke stel van 28 kampies kan 600 ooie huisves.

Waar hulle kon, het hulle gebruikte materiaal, soos wingerdpale, vir hergebruik in die kampe gekoop. Francois reken die projek het hulle R150 000 gekos, ’n bedrag wat lankal verhaal is met die hoër lampersentasie.

Francois sê elke ooi kry net genoeg voer en onnodige koste word uitgeskakel: 350 g lek per dag as hulle in die kampie inkom en 600 g per eenlingooi wat gelam het. Ooie met tweelinge kry twee keer per dag 600 g, terwyl drielingooie 600 g drie keer per dag kry. –

NAVRAE: Mnr. Bertus Eksteen, e-pos: ekst-witvlei@patat.co.za; sel 073 776 6815.