GELUKKIGE, DROË LAMMERS IN DIE SKAAPVOERKRAAL
’n Verhewe lamvoerkraalstelsel kon klaarspeel met nat, koue winterweer wat gewone voerkrale in ’n mismoeras omskep, sê mnr. Johann Wessels van die Waplaas-boerdery buite Heidelberg in die Wes-Kaap.
Die skuurkonstruksie se vloer is 3,5 m bo die grond geheg aan gegalvaniseerde-ysterpilare, waarop die dak, ’n gewone skuurdak, ook gemonteer is.
Seile en skadunet bedek die kante van die struktuur en beskut die diere teen koue, wind en reën. Op warm dae kan dit opgerol word vir ventilasie.
Die vloerstaalplate het diamantvormige gate wat groot genoeg is vir mis en urine om daardeur grond toe te val.
Die vloeroppervlak is 20 m x 15 m groot en verdeel in agt hokke. 1 000 lammers met ’n gemiddelde speengewig van 25 kg kan in die voerkraal gehou word. Sowat 800 lammers met ’n slaggewig van 40 kg kan ingepas word. Die skape beweeg deur ’n drukgang met ’n sementoppervlak en goeie vastrapplek na bo, en kom weer daarlangs af.
“Buiten dat die lammers nooit in hul eie mis staan nie, tel ons die mis wat deur die gate val met ’n laaigraaf op, meng dit met saagsels en gebruik dit as bemesting in ons graanvertakking. Die vloer is hoog genoeg om daaronder in te ry en die meeste van die kante is oop,” sê Johann.
Die lammers se voer word in ’n silo van 18 ton geberg en met ’n awegaar tot by die voerkrippe in die voerkraal geneem. Dit is gekoppel aan ’n tydmeganisme.
Water vloei deur middel van gravitasie van ’n hoër geleë dam na die skaapvoerkraal en beland in ’n “ontvanger-waterbak” met ’n vlotterklep wat die watervlak reguleer. Van daar vloei dit na die verskillende hokke se waterbakke. Die struktuur en voer-en-waterstelsel het in 2007 altesaam sowat R500 000 gekos. –
NAVRAE: Mnr. Johann Wessels, sel 082 550 8276.