BOER BOU KALKTOEDIENER

Mnr. Paul van der Merwe van die plaas Roodewal op Bothaville het ’n werktuig ontwerp wat kalk of verkorrelde kalk op die regte diepte toedien en sodoende suur grond vinniger neutraliseer as wanneer dit bo-op die grond uitgestrooi word.

Van der Merwe se werktuig bestaan uit tande wat die grond diep losbreek. In elke tand is gate op verskillende hoogtes geboor vir die vasbout van twee spesiaal ontwerpte, regopstaande vlerkskare aan weerskante en op die verlangde werkdiepte. Die twee teenoorstaande vlerkskare is só ontwerp en versterk dat hulle, van die voorkant van die tande af beskou, wigvormig na agter wyer word sodat die vlerke ’n voortjie van sowat 45 cm agter die tand vorm wanneer die werktuig vorentoe beweeg. Dit bewerkstellig vermenging.

Die diepte van die vlerkskare onder die grond bepaal hoeveel bogrond daaroor in die grondvoor agter inval. Daar word dit saam met gestrooide kalk of ander misstowwe met die dieper grondlae gemeng. Twee toekrapkouters agter elke tand (en ’n opsionele roller) word gebruik om die saadbed volgens die bepaalde grond-gewas-kombinasie voor te berei. Die werktuig het ook dieptebeheerwiele wat aan ’n trekker se presisiestelsel gekoppel is om die kalk afwisselend op spesifieke dieptes te plaas.

Verskillende presisietoerusting kan hierop gemonteer word, soos kunsmisbakke om ’n voorplantmengsel op die ry toe te dien, of chemikalieë en/of mikro-elemente agter die skare. –

NAVRAE: Mnr. Paul van der Merwe, sel 083 625 7295.