(BYE)BOER IN BETON
’n Meestersgraadstudent aan die Universiteit van Johannesburg, mnr. Ivan Brown, het byekorwe uit beton ontwerp om byeboere te help om meer heuning te produseer en minder tyd aan onderhoud te bestee.
Die resultaat van sy studie was die Beegin-projek, ’n goedkoop en doeltreffende byeboerderystelsel van beton wat heuningproduksie met tot 300% kan laat styg.
Sy oplossing teen diefstal, vandalisme, brande, plae, siektes en onderhoudskoste was om permanente korwe uit liggewig-beton te bou, wat met staal versterk is.
Brown voeg perliet of vermikuliet by sy betonmengsels om die korwe ligter te maak en beter te isoleer.
Omdat die beton beter isolasie bied, gebruik die bye minder energie om die interne temperatuur te reguleer en kan dus meer heuning produseer.
Brown se veldtoetse (op klein skaal) het getoon heuningproduksie in betonkorwe kan met 200% tot 300% toeneem, in vergelyking met houtkorwe waarin soortgelyke swerms in dieselfde gebied en op
dieselfde tyd begin is.
Brown het twee soorte korwe ontwikkel, die Bee Bunka en die Bee Tonnel. Die Bee Bunka is volgens die Langstroth-korfstyl ontwerp, kos sowat R1 000 en bestaan uit drie dele: Die broeikamer, wat sowat 241 mm diep is, met ’n vloer en voorste ingang; daarop kom ’n vlak superkamer van 145 mm diep; en laastens is daar die teleskopiese deksel. Elke kamer kan tien houtrame van 35 mm hou.
Dié soort korf verg gewoonlik ’n middelpuntvliedende tegniek om die heuning te tap. Die hoofdele weeg sowat 60 kg. Die beweegbare dele, soos die deksels en boonste dele, weeg sowat 23 kg.
Die Bee Tonnel, gegrond op die Keniaanse bostaafkorfstyl, is eenvoudiger en kos R700.
Dit bestaan uit ’n enkele trogvormige kamer en deksel. Houtstawe word aan die bokant van die kamer gelê en vinne waaraan die bye hul korwe kan bou, word aangeheg.
Die hele heuningkoek word geoes, wat bykomstige aftaptoerusting oorbodig maak. –
NAVRAE: Mnr. Ivan Brown, e-pos: ivan@ beegin.co.za; webwerf: www.beegin.co.za; Facebook: facebook/beeginSA