Gedenkboek vier 40 jaar van Landbouskrywers
Bayer SA staan bankvas agter Landbouskrywers SA, ’n vereniging vir landboujoernaliste, skakelbeamptes en diegene wat betrokke is by verskillende mediums van kommunikasie in die landbou.
Landbouskrywers SA het die afgelope 40 jaar gegroei van sewe stigterslede in Johannesburg tot meer as 200 lede landwyd. Die vereniging is verteenwoordigend van verskillende media, landboubesighede en organisasies.
Landbouskrywers SA se lede benoem jaarliks kandidate vir Boer van die Jaar, Nuwe Toetreder tot die Kommersiële Landbou en Landboukundige van die Jaar, waaruit wenners aangewys word.
Lede kan ook inskryf vir skryf en fotografiekompetisies wat daarop gemik is om vaardighede deur wedywering uit te bou en uitnemendheid te erken. Bayer SA is saam met Santam Landbou, Sanlam en Rovic Leers die hoofborge van die prysuitdelingsgeleentheid.
Bayer SA borg ook Dekalb en Landbouskrywers SA se eerbewys vir die beste tegniese artikel, wat ’n kontantprys en vliegkaartjie na die Internasionale Federasie van Landboujoernaliste (IFAJ) se kongres insluit.
“Bayer is verbind tot die beginsels van volhoubare ontwikkeling en tot sy maatskaplike en etiese verantwoordelikhede as ’n korporatiewe lid van die samelewing,” het mnr. Kobus Steenekamp, hoof van kommersiële en bedryfsake van Bayer SA, gesê op Landbouskrywers SA se jaarlikse prysuitdelingsaand op 16 November by die Anurawynlandgoed buite Stellenbosch.
“Dit is ’n groot voorreg om by hierdie geleentheid betrokke te wees. Almal het dieselfde doelwitte, naamlik om ons medeburgers te voed, ons gemeenskappe te versterk en ’n beter toekoms vir ons land te skep. Deur hande te vat met Landbouskrywers SA, boere, landboukundiges, borge en ander bedryfsvennote help skep ons die bemagtigende omgewing waarna almal streef.”
GEDENKBOEK
’n Gedenkboek ter viering van die afgelope vier dekades van Landbouskrywers SA se bestaan het ook vanjaar verskyn.
“In organisatoriese terme lyk 40 jaar dalk taamlik kort, maar baie het in ons vereniging gebeur,” sê me. Magda du Toit, uittredende voorsitter van Landbouskrywers SA.
Du Toit het nege jaar lank in dié pos gedien en is al sowat 25 jaar lank ’n lid. Sy is op die jaarvergadering verkies tot die vereniging se verteenwoordiger by die IFAJ. Sy was die grootste deel van haar loopbaan in die wêreld van korporatiewe skakeling en kommunikasie betrokke – eers by Monsanto en nou by Bayer ná die samesmelting van die maatskap pye. Die gedenkboek is een van die groot hoogtepunte in haar dienstydperk as voorsitter.
“Toe ek en Hanlie du Plessis, lid van die Landbouskrywers SA se uitvoerende bestuur, meer as ’n jaar gelede die geskiedenis van Landbouskrywers SA begin navors, was die belangrikheid van ons vereniging se werk baie duidelik. Die geskiedenis het bewys ons lang bestaan en relevansie kan regstreeks toegeskryf word aan die erns en opregtheid van ons lede en uitvoerende bestuur oor die jare heen en hul liefde vir die landbou.
“Die belang van die pryse wat oor die jare aan ons lede oorhandig is, kan nie onderskat word nie. Vir sommige landboujoernaliste was dit ’n hupstoot aan die begin van hul loopbaan, en vir sommige was dit erkenning vir uitsonderlike werk wat uit jare se ondervinding gespruit het,” sê Du Toit.
Sy het die gedenkboekprojek saam met Hanli du Plessis be stuur, terwyl me. Sanet du Plessis die produksie van die publikasie behartig het.
“Ons sê spesiaal dankie aan me. Margaret Lombard, die weduwee van een van die stigterslede en veteraanjoernalis Hans Lombard. Sy het talle dokumente, notules, foto’s en boekies wat Hans oor die jare noukeurig bygehou het, aan ons beskikbaar gestel. Dit het ons gehelp om inligting te versamel van ’n tyd toe die internet en digitale eksemplare nog nie bestaan het nie.
“My opregte hoop is dat hierdie boek sal bydra tot trots in ons vereniging en dat dit lojaliteit onder ons lede en medewerkers sal verhoog. Die inhoud van die boek het die potensiaal om ons lede aan te moedig om Landbouskrywers SA se standaarde te handhaaf en sy toekoms te bevorder,” sê Du Toit.
NAVRAE: Webwerf: www.bayer.co.za; e-pos: magda.dutoit@bayer.com