‘MILAGRO MOET BEKERS WEN’
Mnr. William van Rheede, oftewel Cas, het ná sy eerste beesskou amper nie teruggekeer skouring toe nie omdat dit te uitputtend was, maar ná 14 jaar in die skoubedryf put hy groot genot uit sy werk as hanteerder.
Van Rheede, ’n gebore Noord-Kapenaar, het as 14-jarige saam met sy pa in die Oos-Kaap beland toe hy op ’n melkplaas gaan werk het.
“Daar het ek begin lief raak vir beeste.”
Me. Colette Masterson van Milagro, wat saam met haar man, Andrew, skou, sê Cas moet sorg dat die beeste se staanplek by die skou reg is.
“By die skoue wil mense altyd oorkant Cas in die stalle staan, want hulle weet dit is netjies en aan die kant.”
Sy sê Van Rheede maak vir die diere ’n mooi “bed” van kafbale wat hy netjies ophark, en hy sorg ook dat die strooi altyd silwerskoon is.
“Dit is maar Cas se aanslag. ’n Mens kan sy hand daarin sien,” sê Colette.
Van Rheede sê hy wil seker maak die skoubeeste wat in die skouring uitgaan, voldoen aan die beoordelaars se vereistes, en dat hy alles in sy vermoë doen sodat Milagro bekers huis toe vat ná die skou. Hy is ook verantwoordelik vir die vervoer van Milagro se skoubeeste. Hy moet seker maak die skoubeeste kom ongedeerd en in ’n goeie toestand by die skouterrein. Dié taak verg besonderse vaardighede omdat hy met lewende gewig agter op ’n trok ry, en só moet bestuur dat die beeste nie seerkry of merke opdoen nie.
“Ek maak altyd seker daar is dik strooi op die vloer, ook sodat hulle hoewe nie seerkry nie,” sê hy.
Om ’n wenner in die Grooms’ Challenge te wees is vir Van Rheede “onbeskryflik”. “Dit is vir my ’n baie groot gebeurtenis.” — FREDALETTE UYS