Eerbewyse vir beesboere
Die Aldam-veeskool se wesenlike bydrae tot die lewendehawebedryf is onontbeerlik vir die veesektor. Die beste beesboere in Suider-Afrika is oudergewoonte by ’n galageleentheid aangewys.
Landbouweekblad, die Lewendehawe Registrerende Federasie (LRF) en Breedplan het die Aldam-veeskool vir die tiende keer aangebied. Verskeie eerbewyse is aan belanghebbendes in die veebedryf oorhandig. Mnr. Christopher en me. Karen Sparks van Mount Olive Genetics (Brangus) by Harrismith is Pick n Pay, Breedplan en Landbouweekblad se SuiderAfrikaanse Stoetteler van die Jaar vir 2018. Mnr. Gerhard Schutte, uitvoerende hoof van die Rooivleisprodusente-organisasie (RPO), het ’n merietesertifikaat ontvang vir sy puik diens aan die lewendehawebedryf. Mnr. Llewellyn Angus, die vorige voorsitter van die LRF, is vir sy diens aan die Aldam- veeskool vereer. Zourel Rainmaker XRL15/59, ’n Limousinbul van mnr. Derick le Roux van die Xourelstoetery, Lichtenburg, is Zoetis, Landbouweekblad en Breedplan se Teelbul van die Jaar. Mnr. Vusi Khanyile, voorsitter van die Khanyile-familietrust, het die Pick n Pay/ Rudd-eerbewys vir die beste vordering as teler die afgelope dekade gekry. Oorkondes is oorhandig aan individue en maatskappye wat in die tien jaar van die Aldamveeskool se bestaan ’n groot bydrae tot die sukses van dié geleentheid gelewer het. Ontvangers hiervan was Charl van Rooyen van Landbouweeblad, me. Lee-Ann Alexander van Rudd-produkte, mnr. Tiny Naudé van Zoetis, me. Meiki Tlhabanele van die Land Bank, mnr. Tommy Geyser van Taltek, me. Megan Angus namens Sparta, dr. Munro Marx van Unistel, dr. Vlok Ferreira van Molatek, en mnr. Gerhard Schutte van die RPO.