Boran-osse blink uit in slagkompetisie
Beesboere streef na doeltreffende en winsgewende vleisproduksie. Die slagosgehalte van rasse, soos die Boran, is gevolglik ’n belangrike aspek vir ’n winsgewende beesboerdery.
Die Boran-beestelersgenootskap het op die Alfa-ekspo op Parys (16-20 September) aan twee slagos-kompetisies deelgeneem, naamlik die Molatek-slagos- en die Rooivleisprodusente-organisasie (RPO) se interraskompetisie.
Mnr. Danie Strydom, ’n Boranstoetteler van Kroonstad, het die slagosse voorberei en verskaf vir deelname aan die kompetisies.
Verskillende rasse het in die RPO-interraskompetisie teen mekaar meegeding. Dit was die eerste keer dat so ’n kompetisie gehou is. Die doel daarvan was om te sien waartoe ’n opreg geteelde beesras in staat is.
’n Gewigsbeperking was nie van toepassing nie. Daarom kon rasse objektief vergelyk word volgens die ideale slaggewig vir daardie groep beeste. Die bedoeling was om die rasegte slagvee te vergelyk en nie om die hele ras teen ’n sekere gewig te laat slag nie. Daar is meer wisselvalligheid binne ’n ras as tussen rasse, en danksy dié kompetisie kon rasse bewys hoe hulle in die slagoskraal kan presteer.
In hierdie kompetisie is ook klem gelê op die rooivleiswaardeketting en hoe om te bepaal of ’n dier reg is om geslag te word. Só kan die beste waarde uit die klassifikasie van die karkas gekry word.
Die Boran-osse wat aan die RPO-interraskarkaskompetisie deelgeneem het, het ’n derde plek verower in die afdeling vir beste groep van vier karkasse. Twee-en-dertig karkasse van agt verskillende rasse het meegeding, en die Borans het uitstekend uitgeslag.
Die Borans het ’n tweede plek behaal in die op-die-hoef-evaluering vir individuele osse sowel as in die individuele os-karkaskompetisie.
SLAGOSKOMPETISIE
Vier-en-twintig groepe het aan die Molatek Hoëveld-slagoskompetisie deelgeneem (vier diere in elke groep). In die klas waarin na die beste groep van vier karkasse gekyk is, het die Boran-osse ’n eerste plek ontvang. Die genootskap is trots op dié prestasie en die toekenning bevestig die Boran se goeie eienskappe.
Die Molatek Hoëveld-slagoskompetisie is ingevolge die Suid-Afrikaanse Vleisbedryfsmaatskappy (Samic) se reëls beoordeel. Normale Samicgewigsbeperkings, vetverspreidingen karkaskonformasiestandaarde was van toepassing.
Die beoordeling van die jaarlikse Samic-kompetisie, die enigste in sy soort in SuidAfrika, vind plaas onder die vaandel van die SA Vetveebeoordelaarsvereniging en volgens Samic se reëls.
’n Nismark kan dus hieruit ontwikkel wat ook kan lei tot beter ekonomiese voordele danksy deelname aan die kompetisie. Só ’n nismark se behoefte kan meebring dat ’n premie gehef kan word vir vleis afkomstig vanaf dié ras – teen ’n slaggewig (en gradering) wat die ras sal pas.
PLAASLIKE TOESTANDE
Met hierdie prestasie hoef die Boran nie terug te staan nie. Dit is ook belangrik om op sy ander goeie eienskappe klem te lê, soos sy vermoë as uitstekende benutter van ruvoer en om dit om te skakel in beesvleis van goeie gehalte. Die Boran word beskryf as ’n Afrika-Zeburas en is goed aangepas in beesvleisproduksiestelsels in moeilike Suid-Afrikaanse omgewings- en klimaatstoestande.
Die Boran-beestelersgenootskap lewer ook ’n bydrae tot die winsgewendheid van kommersiële vleisbeesproduksie deur die beskikbaarstelling van vroulike diere uit ’n moederlyn wat ekonomies kan produseer in Afrika-toestande, asook om basterkrag ten volle te kan benut.
Kontak die Boran-beestelersgenootskap se kantoor vir meer inligting.
NAVRAE: Webwerf: www.boran. org.za; e-pos: boran@studbook. co.za; tel. 051 410 0951 of tel. 051 410 0961; mnr. Christopher Havenga (rasadviseur), sel 082 821 1527.