Angus-beesvleis wen wéér
Die Angusras het vanjaar die tweede agtereenvolgende jaar die top-eerbewys in die jaarlikse Alfa-vleisbeesuitdaging op die Alfa-ekspo in die Vrystaat ingepalm.
Besoekers aan die Alfaekspo, wat vanjaar van 18 tot 20 September by die Afridome op Parys gehou is, kon vleis van vyf verskillende beesrasse by dié veeskou en -uitstalling proe. Al die vleis is op dieselfde manier verouder en voorberei en is in ’n “blinde proe” voorgesit. Nadat die publiek geproe en vir hul gunsteling gestem het, het die Angus geseëvier.
“Ek bedank graag die telers wat vleis vir dié interessante uitdaging verskaf het,” het mnr. Albert Loubser, een van die Alfaekspo se organiseerders, gesê.
“Ons het Brahman-, Afrikaner-, Bonsmara-, Simbra- en Angusvleis in vanjaar se uitdaging geproe. Die vleis is nat verouder en voorberei deur die Koepel-slaghuis op Parys.”
Die wenner van die uitdaging is op Donderdag 20 September tydens die Alfa-galadinee aangekondig. Mnr. R.C. Malherbe van die Angus-telersgenootskap van Suid-Afrika het die eerbewys namens dié genootskap ontvang. Angusvleis het vir die tweede agtereenvolgende jaar gewen.
Net soos verlede jaar het mnr. Andrew Masterson van Milagro Farms, net wes van Oesterbaai in die Oos-Kaap, die Angusras in die uitdaging verteenwoordig.
“Ons het 15 kg-Angus-lendeskyf verskaf deur die Sebastiansslaghuis op Humansdorp,” het Masterson gesê. Hy het bygevoeg die oorwinning is nie net ’n bewys van die ras se waarde nie, maar ook die manier waarop die diere grootgemaak word.
“Die vleis is afkomstig van Angusbeeste uit my kommersiële kudde wat op weiding was. Ons kudde loop regdeur die jaar op weiding en die diere word ook afgerond op weiding. Ons gebruik nie groeistimulante of roetine-antibiotika nie en kies om die diere sover moontlik natuurlik groot te maak,” het hy gesê.
Masterson sê Angusbeeste lewer van die beste vleis wat marmering en sagtheid betref.
“Dié eienskappe word verder versterk deur die natuurlike omgewing en menslike behandeling van die beeste.”
VLEISGEHALTE
Die verbruiker bepaal wat die mark wil hê en hulle soek goeie waarde vir geld. En dit is presies wat die Angusras lewer, sê die Angus-telersgenootskap van Suid-Afrika, waarvan Masterson tot onlangs die voorsitter was.
Met die verbruiker wat bewus word van hoe die beeste aangehou word, is daar ook ’n groot vraag na rooivleis wat nie aan hormoonbehandeling blootgestel is nie.
Die Angusras is bekend om die gehalte van die karkas wat dit lewer. Die Angusras voldoen aan verskeie karaktereienskappe, soos vrugbaarheid, ’n natuurlike poenskop, goeie moedereienskappe, geboortegemak en goeie marmering in die vleis.
Beesvleisprodusente is op soek na ’n suiwerder vorm van Angusteelmateriaal om dié vleis te kan produseer. Vanweë die groot genepoel en suiwerheid van die ras, is die Angus dus in aanvraag by kommersiële telers. Die basterkrag wat die Angusbul tot ’n koeikudde voeg, lei tot hoër speengewigte.
’n Uitdaging soos dié is veel meer as net ’n gewildheidskompetisie, sê Loubser.
“Vleisgehalte is een van die gewildste onderwerpe in die beesvleisbedryf. Baie navorsing word oor vleisgehalte gedoen en talle telers en belanghebbendes in die bedryf maak aansprake ten opsigte van die gehalte van hul spesifieke ras se vleis.
“Daar is egter nie ’n platform waarop die gehalte van verskillende rasse se vleis vergelyk kan word nie of, belangriker, waar die verbruiker se mening gelug kan word nie. Die verbruiker is koning en die verbruiker se mening is die een wat in ag geneem moet word wanneer boerderybesluite geneem word – op bedryfs- én op plaasvlak.”
Die kompetisie word in 2019 weer by die Alfa-ekspo (17 tot 19 September) aangebied.