SMS nou en wen gratis kajuite vir Seil-Safari!
Lesers het die kans om een van tien dubbelkajuitbesprekings vir Laeveld Agrochem se Seil-Safari te wen! Die wenners sal gratis toegang tot die volledige program, asook verblyf op die luukse MSC Musica ontvang tydens die volgende Seil-Safari van 1-5 April
Laeveld Agrochem is druk besig met voorbereidings vir die Seil-Safari op die luukse passasierskip die MSC Musica. Dié bootreis duur van Maandagoggend 1 April tot Vrydagoggend 5 April, en vertrek vanaf Durban na Pomene in Mosambiek. Laeveld Agrochem se Seil-Safari is anders as die tipiese luukse bootreis en is pasgemaak vir boere, hul gesinne en mense in landboukringe.
Slegs ’n beperkte aantal kajuite is beskikbaar, maar tien gelukkige paartjies kan gratis dubbelkajuite wen. Om in aanmerking te kom vir die prys, moet jy aan die SMS-kompetisie deelneem. SMS die woord “Seil” saam met jou plaas se naam, jou naam, van en adres na 33677. Volledige bepalings en voorwaardes is op
Landbou.com beskikbaar. SPESIAAL VIR BOERE
Dié unieke landboubootvaart is die geesteskind van mnr. Corné Liebenberg van Laeveld Agrochem. Die program kombineer aspekte van ’n landbouskou, boeredag, werksessies, vermaak en ontspanning, waaronder ’n besoek aan die Pomene-eiland.
“Ons wil ’n spesiale platform skep waar produsente kan ontspan, kennis inwin, lesse uitruil en skakelgeleenthede ontgin – sonder die gejaag van die alledaagse lewe. ’n Produsent staan nooit alleen nie, en op die Seil-Safari kan hy ál die bogenoemde saam met sy gesin beleef, asem skep, batterye herlaai en hoop kry vir die toekoms,” sê Liebenberg.
“So ’n reis is ook nie uitspattig nie. Dit kos baie dieselfde as ’n tipiese gesinsvakansie, inaggenome wat alles ingesluit is. Boonop betaal die produsent self daarvoor. Ons doen dit omdat ons ’n behoefte vir hierdie soort interaksie waargeneem het.” LEER AAN BOORD
Landbousprekers is die Dinsdag en Donderdag aan die woord, met vermaak en musiek tussendeu. Grondhervorming, plaas- en arbeidsbestuur en praktiese wenke oor boerderypraktyke is van die onderwerpe.
Een van die sprekers, mnr. Erik de Vries, hooflandboukundige van Agri Technovation, gaan saam met die Laeveld Agrochem-span praat oor die nuutste produkte en presisiedienste.
Dr. Johan Willemse, bekende landbou-ekonoom, sal perspektief gee oor die ekonomie en hoe dit boere raak. Nog ’n spreker is die bekende beesboer mnr. Nick Serfontein van die Sernick-groep, wat ’n boodskap van hoop gaan bring en meer vertel oor hoe hy opkomende boere oplei.
Mnr. Theo Vorster, uitvoerende hoof van Galileo Capital, en mnr. Theo Venter, politieke en beleidspesialis, sal oor relevante landbousake gesels.
Mnr. Jerry Maritz, uitvoerende hoof van graan by VKB Landbou, gaan ’n aanbieding oor graanverskansing op Safex lei.
Die Woensdag gaan Toyota die nuwe Yaris ten toon stel. Dié motor is ideaal vir die boer se kind wat studeer of in die stad werk.
Donderdag is uitstallersdag, en produsente kry die geleentheid om kennis te maak met die nuutste tegnologie, werktuie en moniteringstoerusting vir die landbousektor. Gesels gerus met kenners en verteenwoordigers om meer oor dié dienste en produkte uit te vind. BLAASKANS
Die nuwe MSC Musica het moderne kajuite en geriewe. MSC bied spesiale vermaak vir kinders. Afgesien van vyfsteraandetes en drie swembaddens is daar minigholf, ’n tennisbaan, ’n vlugbalbaan en ’n speletjiesvertrek.
Gaste kan ook deelneem aan gelukkige trekkings, wat ’n persoonlike kuiersessie saam met van die kunstenaars insluit. TERUGVOERING
Oorweldigend gunstige terugvoering het ná die vorige bootreis aangedui hoekom dit ’n wenwen-geleentheid vir die boer en sy gesin is. “Dit het ons verwagtinge oortref met leersame lesings, goeie vermaak en verblyf, en eersteklas kos en drankies. Dankie vir die onvergeetlike reis,” het mnr. Gys du Toit sr. van die Dutoit Groep gesê. BESPREEK NOU
Die koste beloop vanaf R5 400 per persoon wat ’n binnekajuit deel. Dit sluit alle etes en vermaak, die Pomene-besoek en die konferensie in. Hawebelasting van R1 235 per persoon en drankies is uitgesluit by dié prys.