VERSNEL VRUGBAARHEID IN JOU KUDDE
Beladingstempo en vrugbaarheid is waarskynlik die belangrikste twee pilare van enige beesboerdery. Daar word algemeen aanvaar dat vrugbaarheid laag oorerflik is, en ’n norm van 3% tot 10% word wêreldwyd erken.
“Teen die agtergrond van oorerflikheid, wat die hoeveelheid variasie in ’n eienskap is wat aan gene te wyte is, klink dit egter nie reg dat vrugbaarheid laag oorerflik is nie en ek skop viervoet vas teen dié opvatting,” sê mnr. Gerrit van Zyl, rubriekskrywer van Landbouweekblad.
“Ek sluk ook moeilik daaraan dat 90% van praktiese vrugbaarheid aan bestuur of die omgewing toegeskryf kan word. Omdat die boer vir gewig betaal word, is of was die klem die afgelope 30 tot 40 jaar meer op groei en karkaseienskappe. Eienskappe vir reproduksie by die manlike en vroulike diere is dalk te maklik oorgesien. Vir die kommersiële boer is reproduksieeienskappe egter vier keer belangriker as karkaseienskappe as na winsgewendheid gekyk word.
“Om ’n vrugbaarder kudde te teel is uitskot ’n punt waarby jy kan begin, maar dit moet uiteindelik eers gaan oor die keuse van
die gewenste diere. Omdat bulle ’n baie groter en vinniger bydrae tot ’n kudde lewer, is dit die plek waar jy begin. Altesaam 87,5% van die genetiese samestelling van jou kudde vandag is immers die resultaat van die bulle wat jy die afgelope drie generasies gebruik het,” sê hy.
“Met dié kennis moet ons opnuut konsentreer op die bulle wat ons koop of gebruik. Hou dus aan om die diere wat oorslaan, uit te skot, maar begin ook bulle gebruik wat van vrugbare moeders kom wat op natuurlike weiding sonder te veel hulp gereeld kalf. Stel hierdie bulle dan bloot deur middel van meerbulparing en hou die bulle wat die toets van praktiese vrugbaarheid slaag. Moet nooit ophou om voortdurend met dissipline en sonder verskonings vir dié eienskap te selekteer nie. Jy sal verbaas wees hoe hoog oorerflik vrugbaarheid eintlik is.”