BONNIEVALE SE WONDERWERKSKOOL
Die Tegniese Skool Jakes Gerwel wat vanjaar op Bonnievale oopgemaak het, getuig van ’n gemeenskap se vermoë om te kan saamwerk om ’n beter toekoms vir sy kinders te skep.
Soos op talle ander landboudorpe is werkgeleenthede op Bonnievale seisoensgebonde en is die meeste van die sowat 11 000 inwoners afhanklik van staatstoelaes. Saam met die armoede steek talle ander maatskaplike probleme kop uit.
Toe mnre. Philip Jonker, wynboer van die plaas Weltevrede, en Wilhelm de Wet, ’n aktuaris op Bonnievale, agterkom daar is amper vyf keer meer kinders wat laerskool voltooi as wat daar plek voor is in die enigste hoërskool, wou hulle ’n oplossing vind. Die Wes-Kaapse departement van onderwys (WKOD) het egter nie begroot vir ’n nuwe hoërskool nie, maar was bereid om 40% van die boukoste te dra en te help om onderwysers aan te stel as die gemeenskap grond en 60% van die geld kon gee om die skool op te rig. In 2016 het hulle die JGE-finansieringstrust begin, en sonder om te weet hóé, het hulle ingestem om R65 miljoen bymekaar te maak sodat die skool betyds kon oopmaak vir die 2018-skooljaar – en dit te midde van ’n knellende droogte.
Philip en Wilhelm het ’n stuk grond geskenk en ’n tussentydse beheerliggaam saamgestel wat “al die kleure van die reënboog en die geografiese gebiede van Bonnievale” ingesluit het.
“Ons het aan elkeen gevra: ‘Wat is in jou hand? Doen net wat vir jou uitgemeet is.’ Mense kon ’n enkele baksteen teen R2,50 skenk of klippies op die sportvelde kom optel, plaaslike beroepslui het gratis gewerk of toerusting verniet verskaf en boere het duisende liter brandstof geskenk. Die uiteinde was ’n tegnologies gevorderde skool, wat ’n hoofstroom- én vaardigheidsbaan bied. Tans is daar elf klaskamers, twee rekenaarlokale en twee ingenieurs-, grafika- en ontwerplokale. Die volgende fases sluit nog tien klaskamers, ses tegniese werkwinkels, drie verbruikerstudielokale, vier tennis- of netbalbane en aantrekkamers in.
Me. Kubeshini Govender, hoofopvoedingspesialis vir spesiale projekte by die WKOD, sê: “Nasiebou gaan voort in Bonnievale, want dis nie meer ‘ons’ en ‘hulle’ nie. Almal het hande gevat. Dis ’n model vir die res van die land.”