VOERDOELTREFFENDHEID: DIE VOLGENDE BEESTEELTREVOLUSIE
Die doeltreffende benutting van voer sal in die toekoms een van die belangrikste eienskappe wees waarvoor ’n boer kan selekteer. Met voer – en produksiekoste in die algemeen – wat ál duurder word, is ’n bestuursinslag om meer met minder te doen die nuwe norm.
Die Namibiese veteraanboere mnre. Mecki Schneider en Ebbi Fischer het die voor- tou in Afrika geneem met navorsing wat voerdoeltreffendheid meet en verwerk en ’n outomatiese GrowSafe-toetsstasie vanaf Kanada ingevoer. Daarna het die LNR in Suid-Afrika ook só ’n stasie gekoop.
Dié toets stel boere in staat om die doeltreffendste diere te selekteer wat min voer benodig om maksimaal te groei. “Op hul beurt dra dié meerderwaardige bulle hul gene aan hul nageslag oor sodat húlle ook minder voer as die gemiddelde bees benodig,” sê Mecki.
Die GenTecSol-onderneming, wat die swaers van Ebbi se plaas by Hochfeld as vennootskap bedryf, kan 96 jong bulle op ’n
slag huisves. Siektetoestande kan ook vinniger behandel word – beeste hou soms op vreet tot vier dae voor hy kliniese simptome wys of ’n dag voor hy koorsig word.
Inligting wat die toetsstasie insamel, word by GrowSafe se hoofrekenaar in Calgary, Kanada, opgeberg en verwerk. Die swaers kan vier innames per jaar inpas, en kon reeds die toetstydperk van 84 dae tot 70 verkort, wat die staantyd verminder en die toets goedkoper maak. Twee groepe bulle word getoets: bulle wat 200-300 dae oud is en bulle van 300-400 dae. Bulle wat nie vir teling geselekteer word nie, kan uit die voerstasie geslag word wanneer hulle sowat 400 kg weeg.
“Voerdoeltreffendheid gaan die volgende groot revolusie in beesteling word. Energie is duur en die afronding van beeste in voerkrale gaan gaandeweg duurder word,” sê Mecki. Omdat bulle van verskillende ouderdomme deelneem, is elke groep se onderhoudsbehoeftes verskillend, en dit word deur die verwerking in aanmerking geneem.
Die projek pas ook goed in by die SuiderAfrikaanse Vleisbeesgenomikaprojek vir doeltreffender beesvleisproduksie en die lewering van vleis van beter gehalte.
—