Dié sybokhaar beste ter wêreld!
Kenners sê dit is ’n goeie tyd op die mark vir skaapboere wat wol én vleis betref, en uitsonderlike pryse word steeds vir wol behaal.
Hoewel wolpryse die afgelope tyd wipplank gery en teruggesak het sedert die begin van die 2018-’19-seisoen, behaal Suid-Afrika se wolpryse steeds rekordpryse.
Mnr. Isak Staats, hoofbestuurder van BKB se wol-en-bokhaarafdeling, sê die wolseisoen het op ’n hoogtepunt begin. “Die rand het verstewig, en dit het die pryse intussen effens laat daal.”
Die wolmark het op die eerste veiling van die 2018-’19-seisoen op R238,29/kg gesluit. Dit is sowat 30% hoër as die openings- prys van R183,50/kg in die 2017-’18-seisoen. Die prys het toe ’n hoogtepunt van R253,82/kg bereik. Die prys op die jongste veiling was R206,14/kg.
Mnr. Andrew Pape, besturende direkteur van die wolkoper G. Modiano in Port Elizabeth, sê die wolprys het die afgelope paar jaar in ’n kort tyd baie gestyg, en daar is bespiegelings oor wanneer daar ’n regstelling sal wees.
“Kopers betaal al lank rekordpryse. Dit is nie volhoubaar nie, veral met regerings wat strenger maatreëls op invoerprodukte instel en die koste laat toeneem.”
SYBOKHAAR
Danksy ’n voortreflike genepoel en die goeie fondamente wat haar man gelê het, kon me. Gay van Hasselt en haar seun, Jordi, die beste sybokhaarskeersel ter wêreld lewer. Sybokhaarprodukte is op die luuksegoederemark gerig, wat beteken daar is hoë verwagtinge. Die Van Hasselts se titel as grootkampioen in die jaarlikse Miyuki Keori-kompetisie vir winter- en somerskeersels is dus ’n uitmuntende prestasie.
Hul skeersels is die beste ter wêreld, en hulle het vanjaar dié eerbewys vir die sesde keer in sewe jaar ingepalm – ondanks ’n ernstige droogte in die Karoo. In Junie het hul kleinbokkiesomerskeersel boonop ’n wêreldrekord in die Ermenegildo Zegna-kompetisie behaal toe die Stucken-groep R1 246,10/kg daarvoor betaal het.
“Die eerbewys bevestig dat ons sybokhaar lewer wat die mark verlang én dat ons aan internasionale standaarde vir volhoubaarheid voldoen,” sê Gay.
Die Japannese kompetisie vereis ook volhoubare boerderymetodes wat diere, mense en die natuur in ag neem.