SONNEBLOM 'BLY GOEIE OPSIE VIR DROËR SEISOEN'
Met ’n droër planttyd wat vir die somersaaigebeide voorspel en tans beleef word, is sonneblom oudergewoonte die gewas wat die wa vir talle boere, veral in die weste, heel moontlik deur die drif kan trek.
“Die geluk by ongeluk is dat die nasionale oordragvoorraad vir sonneblom die laagste van al die somergewasse is, wat pryse ondersteun,” sê mnr. Joubert Swanepoel, bestuurder van Agricol se sonneblom-afdeling.
Joubert sê daar is ’n paar ander aspekte van sonneblom wat dit ’n goeie opsie maak vir ’n potensieel moeilike seisoen. “Sonneblom se planttyd is die langste van alle somergraangewasse en is die minste vatbaar vir laat aanplantings.
Een van sonneblom se groot voordele is sy penwortelstelsel wat vog dieper uit die grond kan onttrek as sekere gewasse. Dié eienskap en die feit dat sonneblom minder vog nodig het as byvoorbeeld mielies om ’n ton graan te produseer, maak hierdie gewas relatief droogtetolerant vergeleke met ander akkerbougewasse. Wat planttyd betref, kan boere 20 Januarie as die afsnydatum vir planttyd in die weste beskou.
Met ’n droër seisoen voorspel Joubert ook minder siektes, veral swamsiektes. Boere moet egter steeds hul aanplantings monitor sodat hulle op die regte tyd kan optree.
Terwyl nasionale kultivarproewe ’n goeie oorsig op lang termyn gee oor watter kultivars om te plant, beveel Joubert ook aan dat boere baie nader moet begin kyk na die data van plaaslike strookproewe in hul streke. “Kultivars se prestasie kan noemenswaardig verskil
tussen streke”. Strookproefdata verteenwoordig die prestasie van ’n kultivar vir ’n spesifieke seisoen in ’n spesifieke gebied en kan vir boere ’n goeie aanduiding gee watter kultivars meer aangepas is vir daardie streek.
Sonneblomme is egter vatbaar vir hoë grondtemperature (bo 45 grade Celsius) tydens opkoms, maan Joubert, en boere sal wys wees wanneer daar in baie warm toestande geplant word om hul plantestand met 20-25% te verhoog.
Joubert sê dit is opmerklik om te sien hoe al hoe meer boere somer- én winterdekgewasse plant. “Veral op oorlêlande. Die doel is om koolstofvlakke te bou, beter waterindringing te bewerkstellig en grondgesondheid in die breë te verbeter met die voordeel dat die aanplanting steeds bewei kan word en ’n land dus nie vir ’n hele seisoen onbenutbaar is nie.”