SNYPUNTTEGNOLOGIE INGESPAN VIR VEILIGHEID IN NOORDWES
Schweizer-Reneke se wakker veiligheidsnetwerk wat uit drie noodgroepe van 1 000 lede elk bestaan, werk onverpoos om dié beleërde Noordwes-dorp van misdaad te bevry. Buiten voorkomende maatreëls soos patrollies te voet, per motorfiets en ander voertuie, kameras, vastevlerkvliegtuie en helikopters, is daar nou ook ’n hommeltuig en radiometriese kamera met gevorderde nagsigtegnologie gevoeg.
Mnr. Pierre van de Venter, veiligheidskoördineerder in die distrik, sê om die beperkinge – en koste – van vliegtuie en helikopters te omseil, is besluit om die beste nagsigtegnologie op die mark aan te skaf. “Dit is gevaarlik om in die nag te vlieg omdat kragpale, drade en hoë voorwerpe noodlottig kan wees, veral wanneer jy laag moet vlieg om iemand op te spoor.”
Sonder omhaal is meer as R360 000 ingesamel en het maande lange navorsing gevolg om die beste aankoop moontlik te maak. “Omdat hommeltuie al hoe doeltreffender word namate tegnologie ontwikkel, het ons letterlik alles beproef. In dié stadium is dit die beste kombinasie van hommeltuig en kamerastelsel wat op die mark beskikbaar is,” sê Pierre. “Die kamera is eintlik belangriker as die hommeltuig.”
Die Zenmuse XT640 is ’n termiese kamera wat hittebeelde opspoor. “Dit gebruik nie konvensionele nagsigtegnologie nie. Dit is radiometries, wat beteken die gebruiker kan dit verstel vir verskillende temperature en beeldopsies. Dit bespoedig enige veldtog omdat sekere beelde, soos warm voertuigenjins en klippe, outomaties uitgeskakel word en is veral van uiterste belang waar ons soek na mense wat ontvoer word, of verdagtes wat wegkruip.”
Die stabiele roteeras verseker duidelike kamerabeelde wat nie beïnvloed word deur die beweging van die hommeltuig in winderige toestande nie.
Twee mense is nodig om die hommeltuig – die Matrice 200 van DJI – te beheer. Terwyl een mens die vliegwerk doen, is ’n tweede in beheer van die kamera omdat die kamera onafhanklik van die hommeltuig kan “rondkyk”. Hierdie funksie is veral doeltreffend omdat die hommeltuig ’n sekere gebied kan fynkam, terwyl die kamera ’n 360 grade-gebied kan dophou terwyl die hommeltuig heen en weer vlieg. Die hommeltuig het boonop ’n volgaksie, waartydens dit iemand kan volg wat ge-tag is. “’n Mens kan ook die hommeltuig ’n vasgestelde roete gee en as ’t ware patrolleer sonder om te oorvleuel waar hy reeds gevlieg het.”
Sensors waarsku die hommeltuig teen voorwerpe soos bome, kragdrade of geboue.
“Gemeenskapsveiligheid is ’n kombinasie van samewerking en die betrokkenheid van boere by ’n omvattende veiligheidsplan. Dit moenie ’n verskoning wees vir enigiemand om sy waaksaamheid te verslap nie.”
NAVRAE: Mnr. Pierre van de Venter, sel 083 257 6404.