VAN BEGINNERBOER TOT WÊRELDREKORD IN AGT JAAR

Geen besluit wat die wêreldrekordhouer vir die hoogste sojaboonopbrengs, mnr. Randy Dowdy, neem, word aan die toeval oorgelaat nie. Op ’n besoek aan Suid-Afrika het die Amerikaanse boer van die deelstaat Georgia die gereelde en tydige neem van grondmonsters, die vaslegging van plantdatums en die toetsing van produkte se prestasie tot op die laaste molekule uitgesonder as die driehoek waarop sy rekord van 11,47 t/ha geskoei is.

Hy het ook in 2014-’15 die wêreldrekord vir mielieproduksie onder besproeiing met ’n opbrengs van 503 skepels per acre (sowat 31 ton per hektaar) opgestel. Dié rekord is intussen deur mnr. David Hula verbeter tot meer as 33 ton/ha.

Nie sleg vir ’n beginner sonder landbou-agtergrond en opleiding wat in 2006 begin boer het nie . . . Die moeilikste aanpassing was nie nuwe vaardighede of harde werk nie, maar om sy voete tussen medeboere te vind. “Ek was ’n buitestander en die ander boere het my moeilik aanvaar. Dit was dikwels baie ontmoedigend, en ek het myself voorgeneem as ek suksesvol is, sal ek terugploeg.”

Sy bewerkbare landerye beslaan sowat 2 000 acre (810 ha). Bykans 70% daarvan is onder spilpuntbesproeiing. Hy plant tans mielies, sojabone en ook ertjies, katoen, grondbone, kleingrane en ’n verskeidenheid dekgewasse. Strookbewerking en die minimum versteuring van grond word toegepas, en dekgewasse help om die biomassa in die sanderige grond te verhoog.

Sy sojabone word twee keer geïnokuleer – eerstens in ’n saadbedekker en dan weer in vloeistofvorm in die saadbedding tydens planttyd. Op hierdie manier word siektes en swamme doeltreffend bekamp. Nog ’n faktor is die plantaksie en plantdiepte

vir ’n gelyke stand en opkoms met eenvormige groei.

Dowdy gebruik die Brandt Smart System-blaarvoedingsreeks wat versoenbaar is met glifosaat vir makliker onkruidbestryding. Hy versprei ook sy risiko deur plantdigtheid aan te pas en ook deur verskillende saadmaatskappye te gebruik.

Ondanks die talle bedryfsmiddele, toetse en alle lopende en bedryfskoste maak hy goeie wins. Die totale produksiekoste beloop $2,67 (R33,46) per skepel mielies (0,025 ton) wat gelewer is (40 skepels is gelyk aan 1 ton mielies). Die wins is dan sowat R667,60 tot R917,60 per ton mielies (na gelang van die mielieprys).

Vir sojabone is die prentjie net so goed (37,03 skepels is gelyk aan 1 ton sojabone). Produksiekoste: $7,95 (R99,37) per skepel, oftewel R3 679,67 per ton. Verkoopprys: $10,70 (R133,73) per skepel, oftewel R4 952,02 per ton, en die wins R1 272,35 per ton.

Dowdy sê egter die klem bly altyd op volhoubare en winsgewende produksie, nie op rekords of kompetisies nie. Verder vernuwe hy voortdurend. “Dit is malligheid om dieselfde ding oor en oor te probeer en ’n ander uitkoms te verwag.”