NUWE SA PLANTER HOU LOPENDE KOSTE IN BEDWANG
Geen oorsese geenbewerkingsplanter is opgewasse teen die hoë kleipersentasie van die Drakensbergse voetheuwels nie.
Toe die boere mnre. Christof Brits en Andrew Fyvie van Bergville nie op die rak kry wat hulle soek nie, het hulle by die regte span om hulp aangeklop om ’n planter te kry wat die helfte vinniger kan plant – en boonop akkurater.
Dit het twee jaar geduur vandat hulle by die vervaardiger Rovic Leers gaan aanklop het om hulp vir ’n nuwe soort planter tot die eerste werkbare model op hul plase begin plant het.
Christof en Andrew plant hul sojabone en mielies in rye 45 cm uit mekaar, heeltemal ongehoord vir konvensionele boere wat gewoond is aan die meer tradisionele 76 cm en outydse drievoet (91 cm)-rye. Die nouer rywydte is beter vir onkruiddruk en lewer ook ’n beduidende bydrae tot grondvogbewaring, en boonop is tussenry-mededinging tussen die aangeplante gewasse minder.
Die resultaat is die Rovic Leers MP 31 R457-planter, en vir Andrew is die grootste voordele die aanpasbaarheid by geenbewerkingspraktyke en hoër produktiwiteit. “Met die 12-ry-planter het ons gesukkel om 25 ha per dag klaar te plant, maar danksy die 19-ry se verbeterde werksverrigting kan ons nou byna 50 ha per dag klaar plant.”
Mnr. Dewald Barnard, sakebestuurder by Rovic Leers op Pietermaritzburg, sê die planter is nie net beperk tot geenbewerkingspraktyke nie, en dit kan met dieselfde sukses in konvensionele en minimumbe- werkingstoestande gebruik word.
Die saadeenheid is ontwerp om Precision Planting se presisietegnologie te kan gebruik, en met die Turn Compensation-funksie word net die regte hoeveelheid saad in ’n draai geplant. Die plantspasiëring word dus behou, sonder onnodige vermorsing.
Christof is veral ingenome met die presiesheid van die hoeveelheid saad wat die planter plant en sy lae instandhoudingsvereistes. Rovic Leers het weggedoen met tradisionele breekboute en ’n hidrouliese tand is voor op die planter aangebring om deur klipperige of swaar grond te sny.
Die ry-eenhede is in ’n sig-sag-patroon gerangskik wat help dat materiaal glad en vinnig deur die planter beweeg. NAVRAE: Mnr. Dewald Barnard, e-pos: dewaldb@rovicleers.co.za ;sel 033 346 2727.