Nuusoorsig 2018

AL het 2018 se mielie-oes nie verlede jaar se rekordopbrengs van 17,6 miljoen ton gehaal nie, was dit steeds genoeg om pryse nog geruime tyd op uitvoerpariteitsvlak te hou. Volgens die laaste beraming van die Nasionale Oesskattingskomitee was die verwagte totale oes 12,9 miljoen ton.

Me. Rona Beukes, die Departement van Landbou, Bosbou en Visserye se verteenwoordiger in die Nasionale Oeskattingskomitee, het in November gesê dit lyk of die oes met sowat 400 000 ton oorskat is. Volgens mnr. Wandile Sihlobo, ekonoom van die landbousakekamer Agbiz, was dit egter steeds ver bo plaaslike verbruik van tussen 10 en 11 miljoen ton. Saam met die vorige seisoen se oordragvoorraad bring dit die surplus op meer as 7 miljoen ton te staan vir die bemarkingsjaar.

Tot 30 November is altesaam 1,627 miljoen ton mielies uitgevoer. Selfs al realiseer die voorgenome uitvoer tot einde Desember, sal dit nog onder 2 miljoen ton wees en die surplus kan pryse nog lank onder druk hou.

Op ’n vergadering van die Mielieforum is bekend gemaak dat mielieboere verminder het van 7 562 in 2010 tot 4 399 vanjaar. Mnr. Jaco Minnaar, voorsitter van Graan SA, het dié afname toegeskryf aan gebrekkige winsgewendheid en die ooraanbod. Die oorblywende boere beplant egter meer hektare per boer.

SOJA EN SONNEBLOM

Die verwagte sojaboonoes staan op 1,5 miljoen ton, die grootste tot nog toe. Dit oortref verlede jaar se oes van 1,3 miljoen ton – die vorige rekordoes. Die sonneblomoesskatting staan op 857 000 ton.

Wat sojabone betref, het Suid-Afrika die bemarkingsjaar met die grootste oordragvoorraad in die geskiedenis (310 000 ton) begin. Ondanks dié surplus en persvermoë wat nie benut is nie, is 600 000 ton oliekoek die vorige seisoen ingevoer. Teen die einde van die jaar was gesprekke aan die gang om veevoervervaardigers aan te moedig om meer plaaslike sojabone te benut. Daarmee saam het die hoop opgevlam dat die Chinese mark weens die handelsoorlog met die VSA vir SA se sojabone kan oopgaan.

Nog ’n ontwikkeling in die sojaboonbedryf was dat die geskil tussen die bedryf, die LNR en mnr. Senzeni Zokwana, Minister van Landbou, Bosbou en Visserye, oor ’n tegnologieheffing tot voordeel van saadverskaffers, nou bygelê is. Meer as R100 miljoen kan daardeur verkry word sodat plaaslike sojaboonboere toegang kan hê tot die nuutste GM-tegnologie en teelmateriaal.

Die tegnologieheffing geld reeds in die koring- en garsbedryf, en die drie bedrywe sal gesamentlik tot R1,5 miljard meer per jaar verdien weens opbrengsverhogings danksy beter beskikbare saad, het die Buro vir Voedsel- en Landboubeleid (BFAP) in ’n ondersoek bevind.

KORING

In November het die vierde skatting vir 2018 se koringoes op 1,862 miljoen ton gestaan, teen ’n gemiddelde opbrengs van 3,7 t/ha. Daar is in Oktober en November net meer as 90 000 ton koring ingevoer, meestal vanuit Kanada. ’n Soortgelyke bedeling as in die mieliebedryf, waarvolgens handelaars agt weke vooruit van hul in- en uitvoervoornemens verslag moet doen, tree waarskynlik binnekort in werking.