Kersboomboeke
’n Goeie boek is altyd ’n welkome geskenk. Draai gerus een van hierdie boeke toe om onder die Kersboom te sit.
VIRMA
Kainsmerk deur Annelie Botes. Uitgewer: Penguin Random House. Prys: R280. Annelie Botes sê Kerstyd is vir haar die moeilikste tyd van die jaar. Almal lyk gelukkig en feestelik, maar dis ook die tyd wanneer mense hul Kainsmerke – die letsels wat die lewe gelaat het – beter moet verbloem. In dié kortverhaalbundel vertel Botes op aangrypende wyse menslike verhale oor die daaglikse lewenstryd.
VIRPA
Bank Robber: My time with André Stander deur Allan Heyl. Uitgewer: Penguin Random
House. Prys: R280. Allan Heyl, die enigste oorlewende lid van die berugte Stander-bende, vertel van hul lewe as arrogante bankrowers wat in die 1970’s en 1980’s ’n skrikbewind gevoer en die polisie aan die neus rondgelei het. Die boek neem jou tot in die hart van dié loopbaanmisdadiger wie se lewenskeuses verreikende gevolge gehad het.
VIR DIE LEEFSTYLBEWUSTES
Ambassadeur III. Prys: R300. Dis die derde uitgawe van hierdie luukse Suid-Afrikaanse joernaal wat jaarliks die lig sien, en dis weer eens so mooi dat jy dit op jou koffietafel sal wil uitstal. Byderwetse skrywers, kunstenaars en fotograwe vertel stories oor onderwerpe soos reis, kuns en letterkunde. Een van die hoogtepunte is die fotoverhaal met die samewerking van Gucci en geïnspireer deur André P. Brink se bekende 1963-roman Die Ambassadeur.
VIR DIE LETTERKUNDIGES
Stof deur Alettie van den Heever. Uitgewer: Queillerie. Prys: R290. In dié distopiese roman moet WesKapenaars probeer oorleef ná die “Hardskip”. Oesverliese, stof en ’n skroeiende son is hul werklikheid. Die jong Ampersand is op soek na ’n verlore liefde, maar sy moet ook haar kosbare saad bewaar sodat dit nie in Meconium se hande beland nie.
VIR DIE NATUURLIEFHEBBER
Sky Guide Africa South 2019 deur die Suid-Afrikaanse Astronomiese Vereniging. Uitgewer: Struik Nature. Prys: R145. Maak in die vakansie tyd om saam met die kleinkinders op die gras te lê en die sterrehemel te bewonder. Die gids dui die gebeure aan wat in 2019 die naghemel gaan opkikker, en help jou om sterre en konstellasies uit te ken.
VIR DIE KLEINSPAN
Op die rug van ’n tier deur Dianne Hofmeyr. Uitgewer: Tafelberg. Prys: R150. Tom se getekende tier stap een nag uit die prent en kom vra hom om ’n ent te gaan stap. Tom is bang vir alles wat in die donker skuil, maar die tier stel hom gerus. Die pragtige illustrasies en lieflike storie help kinders om hul vrese te oorkom.
VIR DIE JONGSTE IN DIE FAMILIE
Dino poef ’n planeet deur Tom Fletcher. Uitgewer: Human & Rousseau. Prys: R130. Dirkman en Dino besluit om op ’n ruimte-avontuur te gaan, maar slaan nie ag op Mamma se raad om padkos in te pak nie. Wanneer Dino dan begin smul aan hul ruimtetuig – en alles rondom dit – beland die twee in ’n penarie. Gelukkig maak Dino (of sy ingewande) ’n plan om hulle op moederaarde terug te kry.
VIR OUMA
Toe-Val-Lig saamgestel deur Amore Bekker. Uitgewer: Tafelberg. Prys: R235. ’n Visstok wat in die vlak water opgetel word járe nadat dit in die rowwe see oorboord geval het, ’n Suid-Afrikaner op ’n verlate treinstasie in Londen, en kleintydmaatjies wat kontak verloor en later skoonsusters word. Dís van die merkwaardige (en soms ongelooflike) ware verhale waaroor RSG-luisteraars aan Amore Bekker skryf. In dié bykans 100 verhale oor toeval kan ’n mens soms net jou kop skud oor die lewe se vreemde draaie.