Groter invoer bedreig SA pluimveebedryf
Brasiliaanse invoer en láát reën demp braaihoenderprodusente se winsverwagtinge vir 2019. Dié invoer benadeel ook die sojaboon- en mieliebedryf omdat die vraag na plaaslik geproduseerde voer gevolglik ook afneem.
Plaaslike braaihoenderprodukte is onder druk weens die invoer van goedkoper Brasiliaanse braaihoenderprodukte. Die huidige invoertariewe bied nie genoeg beskerming aan die plaaslike braaihoenderbedryf nie. Die laer pryse lei tot laer bruto inkomste, terwyl onvoldoende reënval met die aanplant van mielies en sojabone tot hoër voerpryse gaan lei. Verbruikers kan nie hoër pryse betaal nie. Die kosteknyptang kan die winsgewendheid van braaihoenderproduksie reeds in die eerste kwartaal van 2019 ’n knou gee.
Absa se seisoenale prysindeks is gegrond op braaihoenderpryse wat sedert 1980 aangeteken is. Volgens dié indeks bereik hoenderpryse ’n hoogtepunt in November elke jaar. Pryse begin daal in Desember.
VARS, HEEL HOENDER
Die maandelikse gemiddelde prys vir vars, heel hoender was R25,68/kg in November. Dit is normaal dat pryse vir dié hoender met sowat 1,9% in Desember sal daal. Weens die groter vraag na vars, heel hoender in Desember is die daling nie so skerp as vir bevrore hoender nie. ’n Prys van R25,18/kg vir vars, heel hoender sou volgens seisoenale neigings op lang termyn normaal wees. Die gemiddelde prys vir vars, heel hoender het egter tot gemiddeld R25,91/kg gestyg. Die laagste pryse wat aangeteken is, het sowat R23,29/kg beloop.
BEVRORE HOENDER
Die maandelikse gemiddelde prys vir bevrore hoender het R25,29/kg in November beloop. Volgens die indeks sal die gemiddelde maandelikse prys van bevrore hoender in Desember 3,6% laer as die prys in November kan wees. Pryse het egter in die eerste week van Desember met 4,5% tot R24,15 gedaal. Die invoer van be vrore nekke, dykwarte en binnegoed uit Brasilië het ’n impak op bevrore hoender en kitsbevrore hoenderstukke in Suid Afrika.
KITSBEVRORE PRODUKTE
Die gemiddelde prys van kitsbevrore hoenderstukke verhandel teen R23,30/kg vergeleke met die maandelikse gemiddelde prys van R23,44/kg in November. Seisoenaal verhandel dié produkpryse in Desember 3,3% laer as pryse in November. Dit is dus nie uitgesluit dat die prys van kitsbevrore hoenderstukke in Desember tot R22,68/kg kan daal nie.
Die TABEL dui aan in watter mate SuidAfrika braaihoenderprodukte uit Brasilië invoer. Die totale invoer vir 2017 was R3,2 miljard. Invoer uit Brasilië in die eerste tien maande van vanjaar het R2,9 miljard beloop.
SuidAfrika het van Januarie tot Oktober reeds R5,138 miljard se braaihoenderprodukte ingevoer. Na verwagting behoort vanjaar se invoer sowat R6,166 miljard te beloop. In randwaarde het die invoer met 20% toegeneem. Die rand se gemiddelde waarde het sedert 2017 van R13,32 ietwat versterk tot R13,16 in 2018 (Januarie tot November).
Die SuidAfrikaanse pluimveebedryf se winsgewendheid en voortbestaan word deur ’n groot toename in invoer bedreig. SuidAfrika se uitvoer van braaihoenderprodukte het van Januarie tot Oktober R870 miljoen beloop. Na verwagting behoort uitvoer vanjaar R1,044 miljard te beloop, wat dui op ’n daling van 16,3%.
Die verhoogde invoer en verlaagde uitvoer van braaihoenderprodukte hou ook probleme in vir ander bedrywe, soos mielies en sojabone. Die invoer van braaihoenderprodukte verlaag die vraag na plaaslik geproduseerde voer, waaronder mielies en sojabone.