Dié week in die landbou
ONWETTIG!
Die Grondwethof het op 11 Desember in die guns van ’n groep Zimbabwiese boere beslis dat oudpresident Jacob Zuma onregmatig en ongrondwetlik opgetree het toe hy saam met ander leiers van die Suider-Afrikaanse Ontwikkelingsgemeenskap (SAOG) meegedoen het aan die opskorting en ontbinding van die SAOG-tribunaal se werksaamhede. Dié handeling het volgens AfriForum, wat die boere bygestaan het, ontneem van hul
reg om deur die tribunaal vergoeding te eis nadat dié tribunaal reeds bevind het dat die Zimbabwiese regering se onteiening van grond sonder vergoeding onwettig was.
NUWEMYN?
’n Steenkoolmynontwikkeling aan die noordelike grens van die Soutpansberg is verlede week deur die Departement van Minerale Hulpbronne goedgekeur. Die Australiese mynmaatskappy MC Mining (voorheen bekend as Coal of Africa Limited) sê in ’n verklaring op die JSE-nuusdiens dat die maatskappy nou sal begin met die uitstaande studies wat vereis word om regulatoriese goedkeuring ten opsigte van omgewingsimpak te voltooi. Die Chapudi-projek beslaan verskeie plase in ’n oos-wes rigting. Dit is nagenoeg 50 km noordwes van Louis Trichardt en 55 km suid van Musina geleë.
TYDELIK DIE BAAS
Mnr. Bennie van Rooy, finansiële hoof van die Land Bank, neem as uitvoerende hoof van die bank waar ná die bedanking van mnr. TPNchocho.Nchochoisdeurdie Kabinet op ’n vyf jaarkontrak as die uitvoerende hoof van die nywerheidsontwikkelingskorporasie (IDC) aangestel. Nchocho, met kwalifikasies en ervaring in ontwikkelingsfinansiering en -bankwese, was sedert 1 Februarie 2015 die Land Bank se uitvoerende hoof. Die bank het in ’n aankondiging op die JSE se Sens-nuusdiens gesê Van Rooy sal waarneem totdat ’n heeltydse aanstelling gemaak is. Van Rooy, ’n geoktrooieerde rekenmeester, is sedert Augustus 2015 die bank se finansiële hoof.
SLEG VIR SAKE
Die landboureus Senwes waarsku dat sakevertroue geknou word deur die politieke onsekerheid wat die gronddebat skep. Hy sê in ’n verklaring hy kan dié negatiwiteit ook in sy eie onderneming se tussentydse resultate sien. “Produsente het hul belegging in en besteding aan die sektor teruggetrek. Senwes het nie hiervan ont- snap nie en die impak hiervan is die duidelikste sigbaar op die besteding aan landboutoerusting,” lui die verklaring. Ander faktore, soos ’n opbou van mieliesurplusse oor die afgelope twee seisoene en ’n ondergemiddelde reënval in die voorseisoen, het besteding ook gedemp. Die maatskappy, wat op die effektebeurs genoteer is, het in die boekjaar tot einde Oktober ’n wins ná belasting van R156 miljoen verdien. Dis 6,8% hoër as in die vorige ooreenstemmende tydperk.
ONAANVAARBAAR
TLU SA waarsku oor toenemende aanvalle op plaaswerkers in Limpopo, wat skynbaar gepaardgaan met werkers wat hul jaarlikse bonusse ontvang en dus meer geld in hul besit het. Onlangs is vier aanvalle in een naweek aangemeld. Mnr. Henry Geldenhuys, ondervoorsitter van TLU SA, vra dat boere hul werkers waarsku om nie al hul geld te trek sodat die voordeel van ’n jaar se harde werk nie ongedaan gemaak word in een rooftog nie. Hy maan boere én werkers om deurentyd paraat te bly.
HOËR INFLASIE
Inflasie het met 0,1 persentasiepunt in November gestyg – van 5,1% tot 5,2%, weens hoër voedselpryse en ’n styging in die dieselprys. Business
Day berig die dieselkomponent van die inflasiekoers toon ’n styging van 23,1% op ’n jaargrondslag en ’n styging van 1,1% vergeleke met Oktober. Al is die inflasiekoers nog ver onder die Reserwebank se mikpunt van 6%, het die bank se monetêre beleidskomitee aangedui hy wil eerder hê dat inflasie rondom 4,5% moet wees. Voedselprysinflasie was 2,8%.