DIEANDERSÊ

DIE politieke kommentator mnr. Max du Preez meen die ANC het ’n hele jaar van destabilisasie van die landbousektor en die ondermyning van Suid-Afrika se internasionale beeld toegelaat omdat hy nie wou lyk of hy terugstaan vir die EFF nie.

In sy rubriek op News24 sê Du Preez as die nuwe onteieningswetsontwerp volgende jaar deur die Parlement gepromulgeer word, sal dit nie nodig wees om die eiendomsklousule in die Grondwet te verander nie. Dit sal dan aan almal duidelik wees dat die emosionele gronddebat, wat soveel verdeeldheid, onsekerheid en ’n afname in beleggersvertroue veroorsaak het, oor politieke wedywering en goedkoop populisme gegaan het pleks van die werklike herverdeling van grond.

“Die ANC het in sy eerste 23 jaar aan bewind nie veel omgegee vir grondherverdeling nie. Grondhervorming en restitusie het teen ’n slakkegang gevorder en het feitlik tot stilstand gekom in die Zumajare.”

Die EFF het verlede jaar die grondkwessie opgeroep en die ANC het hom nagedoen omdat hy geen ideologiese rigting het nie en omdat hy ook self die populistiese virus opgedoen het, skryf Du Preez

“Die ANC-leiers het goed geweet die Grondwet is nie die struikelblok vir radikale grondhervorming nie, maar het nie die binnegoed gehad om te weier om deel te neem aan ’n klugspel wat meestal net die sentiment teen wit mense opgesweep het nie.

“Hulle het dit geweet omdat die hoëvlakpaneel onder die ANC se eie Kgalema Motlanthe só bevind het in die verslag wat die Parlement aangevra het.”