DIE ANDER SÊ
MNR. Tito Mboweni, Minister van Finansies, het die Harvardekonoom mnr. Ricardo Hausmann as raadgewer aangestel, met die volle wete dat die ANC-regering Hausmann se raad oor produktiewe kennis sedert 2008 reeds botweg ignoreer.
Hausmann, ’n voormalige kabinetsminister van Venezuela, was die voorsitter van ’n internasionale paneel kundiges wat deur oudpres. Thabo Mbeki aangestel is om hom te adviseer rakende die projek vir versnelde en gesamentlike groei in Suid-Afrika (Asgisa). Van dié paneel se verreikende aanbevelings was om swart ekonomiese bemagtiging met ekonomiese groei te laat strook en om alles moontlik te doen om die uittog van hoogs bekwame wit mense te stuit.
Hausmann sien produktiewe kennis as die sleutelfaktor wat suksesvolle lande van onsuksesvolles onderskei, met ’n gebrek aan die nodige kennis wat ekonomiese groei en ontwikkeling vertraag.
Vanaf 1990 tot 2003 het Suid-Afrika 7% van sy beroepsopgeleide mense verloor – hoofsaaklik hoogs opgeleide wit mense.
Ná ’n mate van stabiliteit gedurende die jare van goeie groei onder Mbeki en mnr. Trevor Manuel, gewese Minister van Finansies, is ’n verdere uittog aangespoor deur die groeiende onbekwaamheid binne staatsinstellings weens kader-ontplooiing wat produktiewe kennis getroef het.
Die huidige situasie van lae groei en hoë werkloosheid word alte dikwels aan die Guptas en staatskaping toegeskryf, maar inderwaarheid het die ondoeltreffende ekonomiese beleid en ondoeltreffende, belemmerende administrasie ’n erger uitwerking gehad.