PLAASAANVALLE DAAL, MAAR DIEFSTAL GEDY
TLU SA se statistieke oor plaasaanvalle en plaasmoorde in Suid-Afrika dui daarop dat plaasaanvalle en -moorde van 2017 tot 2018 gedaal het. Dié statistieke word vir ’n kalenderjaar bygehou, sê genl.maj. Chris van Zyl, adjunk-hoofbestuurder van TLU SA.
“In 2018 is 382 aanvalle en 53 moorde op plase aangeteken. In 2017 is 423 aanvalle en 80 moorde aangeteken,” sê Van Zyl. “Hierdie statistieke is gegrond op die polisie se definisie van ’n plaasaanval en ’n plaasmoord.”
Van Zyl sê hoewel minder aanvalle aangeteken is, het veral diefstal van brandstof, chemiese produkte en veediefstal op plase skerp gestyg. “Die statistieke rakende geweldsmisdaad vertel een storie, maar as ’n mens al die verskillende misdade in ag neem, skets dit ’n donkerder prentjie.”
VEEDIEFSTAL GEORGANISEERD
Klagtes oor veediefstal het toegeneem gedurende die afgelope feestyd, sê mnr. Johan Stadler, ondervoorsitter van die nasionale veediefstalvoorkomingsforum. “Die klagtes het einde November 2018 begin toeneem, veral met veilingsmaatskappye wat begin sluit het, en die groter vraag na vleis met die naderende feestyd.”
Volgens Stadler kry hulle tans baie klagtes oor vee wat van 21 Desember tot 30 Desember
2018 gesteel is. “Dis nie net enkele diere wat vir onder meer die pot gesteel is nie, maar tientalle diere op ’n keer. Dus is die misdadigers georganiseerd.”
Mnr. Tommie Esterhuyse, voorsitter van Agri SA se veiligheidskomitee, sê in die derde week van Desember is daar drie keer groot getalle skape op verskillende plase in die distrik Heilbron, waar hy boer, gesteel. “In die eerste voorval is 71 skape gesteel, in die tweede voorval 67 skape en in die derde voorval 89 skape.”
Esterhuyse sê boere en lede van landelike gemeenskappe moet bedag wees op rondloperdiere wat langs openbare paaie gesien word, iets wat die afgelope paar weke toegeneem het. “In verskeie voorvalle is dié diere by die owerhede aangemeld, en by nadere ondersoek is gevind dit is gesteelde vee waarna gesoek word.”
STOKVEL-RISIKO
Boere word aangemoedig om hul werkers behoorlik in te lig oor die risiko wat ’n stokvel vir hul veiligheid kan inhou, sê Esterhuyse.
“Daar was ’n toename in aanvalle op plaaswerkers omdat hulle groot kontantbedrae van ’n stokvel by hul huis gehou en booswigte daarvan uitgevind het.” Werkers moet ingelig word dat hulle die stokvel as vertroulik tussen die deelnemers moet hanteer, en dat hulle die geld liefs in ’n bankrekening moet hou.
Die polisie se omkeerstrategie om landelike veiligheid in Suid-Afrika te bevorder, word in Februarie bekend gestel. Esterhuyse sê hulle is hoopvol misdaad sal met dié strategie en met die samewerking van al die betrokke partye doeltreffend bekamp kan word.