Maties vereer landbou-ekonoom
DIE Universiteit Stellenbosch (US) het prof. Nick Vink (BO), landbou-ekonoom, met ’n kanselierseerbewys vereer.
Die US sê in ’n verklaring die eerbewys is vir Vink se volgehoue uitmuntende prestasie en navorsingsuitslae oor jare. Vink is voorsitter van die departement landbou-ekonomie aan die US se fakulteit landbouwetenskappe.
Prof. Danie Brink, dekaan van die fakulteit, sê in ’n verklaring Vink is bekend daarvoor dat sy navorsing nuwe perspektiewe oor sy vakgebied bring en altyd die historiese invloede uitlig en die fisieke omgewing in ag neem. Vink het volgens Brink homself oor die jare as toegewyde leermeester onderskei en het meer as 50 nagraadse studente opgelei.
“Sy loopbaan word deur volgehoue uitnemendheid gekenmerk. Hy is ’n rolmodel vir alle toekomstige landbou-ekonome,” sê Brink.
GEREKENDE NAVORSER
Vink het sy loopbaan as dosent aan die destydse Universiteit van die Noorde begin, het daarna by die Ontwikkelingsbank gewerk en is sedert 1996 dosent aan die US.
“Ek is my lewe lank ’n navorser en beleidsontleder, maar wat my eintlik akademie toe gelok het, was klas gee,” sê hy luidens die verklaring.
Hy is die skrywer van 167 publikasies, waaronder 11 boeke as redakteur of mede-redakteur, en meer as 50 artikels en boekhoofstukke in internasionale publikasies. Hy het ook verskeie redaksionele pligte vir wetenskaplike tydskrifte vervul.
Vink sê hy sien die eerbewys, ná aan die einde van sy loopbaan, nie as “dankie vir jou lang diens nie”, maar as aansporing om in dié laat skof nog al die voordele en voorregte van sy alma mater te geniet.
—