Só wil die staat uitbetalings vir ongeskiktheid verhoog
DIE Departement van Arbeid beoog om die uitbetalings aan werkers wat tydens die uitvoering van hul pligte beseer word, siektes opdoen of sterf, te verhoog. Verhogings van sowat 6% word in die vooruitsig gestel.
Me. Mildred Oliphant, Minister van Arbeid, sê in ’n kennisgewing in die Staatskoerant van 7 Desember 2018 dat die nuwe minimum en maksimum voordele vanaf 1 April 2019 sal geld.
Werkers wat deeltyds vir ’n bepaalde tyd heeltemal ongeskik vir werk verklaar word, sal steeds soos in die verlede geregtig wees op ’n maandelikse salaris gelykstaande aan 75% van hul gewone salaris, tot hoogstens R28 658 per maand. Die vorige maksimum was R26 934, wat beteken dat die nuwe uitbetaling 6,4% meer sal wees.
SO WERK VERGOEDING
Diegene wat heeltyds ongeskik verklaar word teen ’n ongeskiktheidskoers van 30% en meer, sal ’n enkelbedraguitbetaling ontvang gelykstaande aan vyftien keer hul normale maandelikse vergoeding. Die minimum vergoeding sal R75 420 wees en die maksimum R301 680.
Persone wat minder as 30% heeltyds ongeskik verklaar word, sal eenmalig vergoed word in verhouding tot die ongeskiktheidsgraad.
Heeltydse ongeskiktheid van 100% sal lei tot ’n maandelikse pensioen gelykstaande aan 75% van die persoon se laaste salaris, onderworpe aan ’n minimum en maksimum van onderskeidelik R4 012 en R28 658.
Vir ’n heeltydse ongeskiktheidsgraad van 30% tot 100% sal ’n maandelikse pensioen in verhouding hiermee betaal word, ook onderworpe aan ’n minimum en maksimum van onderskeidelik R4 012 en R28 658.
STERFTEVOORDEEL
In die geval van dood sal ’n eenmalige bedrag aan die werker se naasbestaandes uitbetaal word, gegrond op ’n bedrag gelykstaande aan twee keer die maandelikse pensioen wat in die geval van totale ongeskiktheid ontvang sou word, onderhewig aan ’n minimum en maksimum van onderskeidelik R8 024 en R57 316.
’n Maandelikse pensioen gelykstaande aan 40% van dié maandelikse bedrag is aan die werknemer se gade betaalbaar, tot hoogstens R11 464.
As die werknemer meer as een gade het, sal die 40% in gelyke dele onder die gades verdeel word. Hoogstens 20% van die maandelikse pensioen is aan ’n kind betaalbaar en in die geval van meer as drie kinders sal 60% in gelyke dele onder die kinders verdeel word.
Hoogstens R18 251 vir begrafniskoste sal uitbetaal word. Die minimum vir gratis kos is tot R285 per maand verhoog en vir gratis verblyf tot R128 per maand.
Al die bedrae sal uit die Vergoedingsfonds betaal word ingevolge die Wet op die Vergoeding vir Beroepsbeserings en -siektes (Wet 130 van 1993).