Nóg navorsing nodig oor nuwe skorsiesiekte
’N Moontlik skadelike bakteriese siekte by skorsies is op ’n plaas in die noorde van die land ontdek, en die bedryf span nou saam om proaktiewe oplossings daarvoor te vind en verspreiding te keer.
Dr. Teresa Goszczynska van die Landbounavorsingsraad (LNR) se plantgesondheid-en-beskermingsafdeling het die patogeen wat die siekte veroorsaak, geïdentifiseer as ’n bakterie, Pseudomonas syringae pv. syringae. Omdat dié familie bakterieë so divers is, word nog nie algemeen in die bedryf aanvaar dat dit wel dié spesie is nie, en nog navorsing is nodig.
Die bestryding van dié bakterie is ook nog nie ondersoek nie, maar volgens me. Wilmarie Kriel, senior plantpatoloog by Starke Ayres Seed, moet produsente die normale sanitasiebeginsels toepas en keer dat oornat toestande voorkom of skorsies onnodig onder stres verkeer.
“Oorbemesting met stikstof en insekskade moet ook vermy word. Die herkoms, verspreiding en oorsaak van die besmetting met hierdie bakterie moet nog bepaal word. Die besmetting is op ’n enkele plaas gewaar en dit is dus nie ’n epidemie nie,” sê sy.
SKADE MOONTLIK
Volgens die LNR kan hierdie bakterie aansienlike skade aanrig in ’n skorsielandery, maar bestrydingsmaatreëls moet nog geformuleer word. Hoewel koper vir die meeste bakteriese siektes voorgeskryf word, twyfel Kriel of hierdie bakterie slegs deur koperbehandeling gestuit kan word, omdat koperweerstandigheid reeds in baie stamme van hierdie spesifieke bakteriefamilie bevestig is.
“Hierdie is nie ’n pas ontdekte bakterie nie, maar die siekte wat dit by skorsies veroorsaak het, is nuut en onbekend by skorsies,” verduidelik Kriel. Sy sê die bedryf samel tans meer data oor die siekte in en aksieplanne sal na gelang daarvan ontwikkel word.
Die vroeë simptome van die siekte is nog onbekend omdat die oorsaak nog bepaal moet word, maar Kriel vermoed dit is klein, waterige vlekke op die skil van die skorsies. By volwasse skorsies met gevorderde besmetting is die simptome groot, waterige vlekke en skorsies wat aan die binnekant vrot.
Indien skorsieboere bekommerd is dat dié siekte moontlik op hul plase uitgebreek het, kan hulle ’n e-pos stuur aan Kriel by Wilmarie@starke ayres.co.za of Goszczynska by GoszczynskaT@arc.agric.za.