SPAANSE PROTES OOR SA SITRUS IS SKOON BOG
SPANJE se teenstand teen Suid-Afrikaanse sitrus wat glo “Spaanse vrugtepryse onder druk plaas”, is niks meer as aandagsoekery nie. Só sê mnr. Deon Joubert, die Suid-Afrikaanse Sitruskwekersvereniging (SKV) se gesant vir markaangeleenthede in die Europese Unie (EU).
Altesaam 27 Spaanse munisipaliteite het onlangs protes aangeteken teen vrye handelsooreenkomste met sitrusuitvoerders in Suider-Afrika. Volgens mnr. Charles Peres, algemene sekretaris van die Spaanse produsenteorganisasie La Unio, knou die teenwoordigheid van Suid-Afrikaanse sitrus in die Europese mark Spanje se sitrusbedryf. Spanje se sitrusuitvoer het verlede jaar met 14% gedaal.
Joubert sê Spanje se klagtes spruit uit ’n toegewing wat die EU gemaak het deur ’n tariefverlaging op Suid-Afrikaanse Valencias vanaf 15 Oktober verlede jaar. “Dit is nie iets waarvoor ons gevra het nie. Dit is deel van ’n groter handelsooreenkoms en het eintlik weinig impak op ons bedryf,” sê hy.
‘SOEK SONDEBOK’
Joubert en mnr. Justin Chadwick, uitvoerende hoof van die SKV, wys daarop dat nie ’n enkele Valencia ná 15 Oktober 2018 na die EU uitgevoer is nie. Die enigste Valencias wat teen daardie tyd nog in Europa beskikbaar was, was vrugte wat opgeberg word vir versapping. Dit is nie deur die tariefverlaging geraak nie.
Joubert gee toe dat Spanje in die vroeë seisoen taai mededinging van Suid-Afrika kry met sagtesitrus. “Omdat dit vroeg in die seisoen is, is die gehalte van die Spaanse vrugte nie watwonders nie, en dan moet dit op die rak meeding met laat Mandaryne uit Suid-Afrika. Dieselfde geld egter weer aan die begin van ons seisoen, wanneer ons sagtesitrus met hul laat Mandaryne moet meeding. Dis internasionale handel. ’n Mens bestuur dit net.”
Volgens Joubert soek Spanje ’n sondebok vir die land se landbouprobleme. “Dit gaan nie goed met die Spaanse ekonomie nie. Groot getalle immigrante lei tot talle maatskaplike en ekonomiese probleme, kleinboere sukkel om winsgewend te bly, en boonop is werkloosheid in sekere distrikte ’n probleem.”
GEEN UITWERKING
Hy sê die Spaanse sitrusbedryf kry baie strawwer mededinging van produsente in die Noordelike Halfrond, soos Marokko, Egipte en Amerika. Die EU se tariefverlaging op Suid-Afrikaanse sitrus in Oktober was vir Spanje ’n strooihalm om na te gryp.
Joubert is nie bekommerd dat die bohaai tot markbeskerming teen Suid-Afrikaanse sitrus in Europa sal lei nie. “Suid-Afrika is in ’n goeie posisie. Die land lewer goeie vrugte en kry dit reg om swartvlek en besmetting met valskodlingmot suksesvol te bestuur. Daar is heelparty ander uitvoerlande wat voor Suid-Afrika in die ry staan vir slae as die EU druk op uitvoer uit die Suidelike Halfrond wil toepas.”