KYK BETYDS NA BANDDRUK
’n Banddruk-monitorstelsel waarmee jy as ’t ware ’n pap wiel sien (én hoor) aankom, is nou beskikbaar. Wanneer ’n band lugdruk verloor, waarsku ’n skril alarm die bestuurder om eerder stil te hou voor die band onherstelbaar beskadig word of die voertuig dalk buite beheer raak.
Tyre Care bemark vier verskillende banddruk-monitorstelsels. Elke stelsel bestaan uit ’n monitor wat bo-op die instrumentepaneel of aan ’n motorfiets se stuurstang gemonteer word. Elke wiel kry ’n interne of eksterne sensor aan die lugklep wat voortdurend inligting oor die banddruk en -temperatuur aan die monitor deurstuur, waar dit in duidelike digitale syfers aangedui word.
Die eksterne klepsensor word in die plek van ’n gewone klepdoppie aan die klep geskroef. ’n Sluitmoer verseker dit kan nie maklik afgehaal word nie. Die interne sensor is ’n integrale deel van die klep en word aan die binnekant van die velling gemonteer.
Die alarm kan vir die wiele se minimum en maksimum toelaatbare druk, asook die maksimum toelaatbare temperatuur, ingestel word.
Die vier verskillende banddrukmonitorstelsels is: Die seswielstelsel, wat ontwerp is vir voertuie met dubbelagterwiele of ’n vierwielvoertuig wat ’n sleepwa of woonwa sleep. Die vierwielstelsel, wat geskik is vir konvensionele vierwielvoertuie. Die tweewielstelsel, wat gebruik word vir ’n sleepwa of woonwa. Die tweewiel-motorfietsstelsel. Dit het ’n monitor wat stewig aan die stuurstang vasgeklem word, en is slegs met eksterne klepsensors beskikbaar. Die seswiel- en die vierwielstelsel spog met ’n sonpaneelmonitor. Die USB-kabel wat saam met die stelsel kom, is feitlik onnodig. Die sensors se batterye is vervangbaar.
– Andries Groenewald Prys: R1 700 tot R3 000
NAVRAE: Webwerf: www.tyrecare. co.za; tel. 044 874 1445.