Smul aan slaai

Op ’n warm dag is ’n mens dikwels lus vir iets koels en ligs vir ete. Hierdie smullekker slaaie uit ons toetskombuis is ideaal vir die somer.

Sprinkel geroosterde, gevlokte amandels oor. As jy slaaisous wil maak, meng suurlemoensap, heuning en dalk ’n bietjie ekstra olyfolie in die bak waarin die kaas gemarineer het. Meng goed, geur met sout en peper en drup dit net voor ete oor die slaai. Maal swartpeper oor en sit voor. Lewer 6 porsies.

Hoenderlewerslaai met eier en avokado

Dié proteïenryke slaai is die perfekte somermiddagete. Ek hou daarvan om dit met ’n koel jogurt-en-kruiesous voor te sit, maar as jy van ’n bietjie meer byt hou, maak ’n basiese vinaigrette en roer ’n groot lepel soetrissiesous en ’n paar skeute Tabascosous daarby. Klam die slaai daarmee aan.

250 g hoenderlewers, skoongemaak Sout en vars gemaalde swartpeper 3 ml gerookte paprika 3 ml brandrissievlokkies Olyfolie, vir braai 2 ryp avokado’s, geskil en in growwe stukke gesny 4 hardgekookte eiers, in wiggies gesny 3 selderystele, fyn gekap 2 hande vol botterslaaiblare, grof geskeur 100 ml parmesaanskaafsels

Jogurt-en-kruieslaaisous

80 ml natuurlike jogurt 45 ml vars suurlemoensap 30 ml fyngekapte, vars kruie van jou keuse (ons het pietersielie, kruisement en basiliekruid gebruik) 30 ml mayonnaise Sout en vars gemaalde swartpeper na smaak Knippie suiker of druppel heuning

Geur die hoenderlewers met sout en peper, paprika en brandrissievlokkies. Verhit olyfolie in ’n pan tot matig warm en braai die hoenderlewers daarin tot net-net gaar. Haal die pan van die hitte af en laat die lewers afkoel tot louwarm. Rangskik die avokadostukke, eierwiggies en seldery op ’n bed van botterslaaiblare en skep die louwarm lewertjies daarop. Sprinkel parmesaanskaafsels oor. Roer al die bestanddele vir die slaaisous saam en drup dit oor die slaai. Lewer 2 groot porsies.

Kerriehoenderslaai met druiwe en seldery

Ek maak hierdie slaai gereeld in die somer. Die kombinasie van soet en speseryegeure en van bros, sagte en romerige teksture is heerlik. Boonop is dit vullend en gesond. Pleks van druiwe gebruik ek ook graag ontpitte lietsjies.

Kerriehoender

4-5 groot, gaar hoenderborsies, sonder vel of been 15 ml olie 2 knoffelhuisies, fyn gekap 5 ml fyngerasperde, vars gemmer 30 ml blatjang 100 ml goeie mayonnaise 100 ml natuurlike jogurt Sout en vars gemaalde swartpeper na smaak

3-4 hande vol gemengde slaaiblare van jou keuse 250 ml pitlose, rooi druiwekorrels, gehalveer 2-3 selderystele, fyn gesnipper 50 g okkerneute, gerooster en grof gekap Vlok of sny die hoenderborsies in stukkies. Hou eenkant. Verhit die olie in ’n pan en braai die knoffel en gemmer stadig daarin tot geurig. Voeg die blatjang by en braai vir ’n paar sekondes. Verwyder van die hitte en roer die mayonnaise en jogurt by. Geur die sous na smaak met sout en peper en roer dit deur die hoender. Verkoel tot benodig. Net voor ete, skep die kerriehoender op ’n bed van die gemengde slaaiblare en sprinkel die druiwe, seldery en okkerneute oor. Sit die slaai voor saam met vars saadbrood of volkoringbrood. Lewer 4 porsies.

Soetsuur rysslaai met nektariens

Propvol geur en lekkerte. Dié sakpasslaai is heerlik, veral by gebraaide hoender- of varkvleis.

40 ml olyfolie 1 ui, gehalveer en dun gesny 5 ml gerasperde, vars gemmer 2 knoffelhuisies, fyn gekap 3 ml elk komyn, kaneel en neutmuskaat 500 ml gaar rys (wit- of bruinrys) Sap van 1 groot suurlemoen 15 ml bruinsuiker Sout en vars gemaalde swartpeper 4 nektariens, ontpit en in happiegrootte stukkies gesny 1 komkommer, in stukkies gesny ‘n Paar babawortels, in repies gesny

45 ml vars koljanderblare of pietersielie, grof gekap ’n Paar vars kruisementblaartjies, fyn gekap Olyfolie en vars suurlemoensap

Verhit die olie in ’n kastrol en braai die ui, gemmer en knoffel daarin tot die ui gaar is. Voeg die speserye by en braai tot geurig. Voeg die rys, suurlemoensap en bruinsuiker by en braai tot die rys met ’n speserylagie bedek is. Verwyder van die hitte en geur na smaak met sout en swartpeper. Skep die rys in ’n bak en laat afkoel. Voeg die nektariens, komkommer, wortels en kruie net voor ete by. Meng liggies deur en bedruip met olyfolie en ekstra suurlemoensap. Geur weer met sout en vars gemaalde swartpeper indien verkies, en sit voor. Lewer 6 porsies.

Steak-en-chorizoslaai met tamaties en soetrissie

’n Regte manne-slaai. Met soveel vleis en so min blare sal hierdie eenvoudige dog vullende slaai beslis in ’n vleiseter se smaak val.

Olie, vir braai Halwe chorizowors (ongeveer 125 g), gesnipper 200 g beesfilet Sout en vars gemaalde swartpeper 10 ml Dijonmosterd ‘n Skeut witwynasyn en olyfolie 500 g kersietamaties, gehalveer 1 rooi en 1 geel soetrissie, in blokkies gesny 2 hande vol babaspinasieblare Vars suurlemoensap

Verhit ’n bietjie olie in ’n pan en braai die chorizostukkies daarin tot bros. Skep uit en hou eenkant. Geur die beesfilet met sout en peper en vryf goed in met mosterd. Braai die filet in dieselfde pan (en olie) as waarin die chorizo gebraai is tot goudbruin buite-om, maar nog liggaar. Haal die vleis uit die pan en bedek. Laat die vleis vir minstens 15 minute rus voor die filet in dun skyfies gesny word. Hou eenkant. Voeg ’n skeut asyn by die vleissouse in die pan en laat dit vinnig opkook, terwyl die boom van die pan geskraap word. Voeg ’n skeut olyfolie by. Giet die warm slaaisous oor die skyfies filet en die gebraaide chorizo en hou eenkant. Sit die helfte van die kersietamaties saam met die soetrissies in die pan en drup ’n bietjie olyfolie oor. Verhit tot die groente begin braai, en braai liggies tot die tamaties en soetrissies net sag begin raak. Geur met sout en peper, en hou eenkant. Skep die souserige steak en chorizo net voor ete op ’n bed babaspinasieblare. Voeg die vars kersietamaties by die gebraaide tamaties en soetrissies en skep dit oor die vleis. Drup ’n bietjie vars suurlemoensap oor en geur weer met sout en peper indien verkies. Sit dadelik voor. Lewer 2-4 porsies.