Wat beteken wense vir nuwe jaar?

My nuwejaarswense vir jou is ’n daaglikse wandeling met God en ’n familierykdom waar God deel is van jou gesin.

Aan die begin van ’n nuwe jaar word nuwejaarswense altyd uitgedeel. “Voorspoedige Nuwejaar!” is sonder twyfel een van die elemente. Maar as die wens aan die eis van opregtheid wil voldoen, sal ons eerlik die volgende vraag moet beantwoord: Van watter soort voorspoed praat ons nou eintlik? Is dit die gewone dinge wat ons in gedagte het?

Laat ons dadelik sê dié “gewone dinge” is glad nie onbelangrik nie. ’n Gerieflike huis, goeie kos op die tafel en gesondheid om dit te geniet, ’n goeie werk om ’n inkomste te verseker, ’n gelukkige gesinslewe . . . Só kan ons voortgaan en die lys van “gewone dinge” langer maak.

Vir baie mense is hierdie dinge, wat ons meermale as vanselfsprekend beskou, glad nie ’n gegewe nie. Ek voel uit my hart uit jammer vir jong mense wat op hul eie bene begin staan as ek dink hoe moeilik dit is om net die allernoodsaaklike te bekom. Ons kan gerus ook op hierdie vlak vir hulle ’n voorspoedige nuwe jaar toewens.

As ons dit klaar gedoen het, het ons egter nog baie effens gedelf in die volledige betekenis van voorspoed. Groter en ryker as al hierdie dinge is ’n lewe gevul met die heerlike teenwoordigheid van die Gees van God. Teen hierdie agtergrond is my nuwejaarswense vir jou dus ’n daaglikse wandeling met God en ’n familierykdom waar God deel is van jou gesin.