SPANJAARDE SUUR OOR SA SE LEMOENE
Spanje beleef tans een van sy swakste uitvoerjare nóg en pak gedeeltelik die skuld op Suid-Afrika “wat die mark volmaak”.
Dié land vra onder meer dat die ooreenkoms waarvolgens lemoene van Suid-Afrika na die Europese Unie uitgevoer word, hersien moet word aangesien ’n verlengde uitvoertydperk ly tot swakker pryse en ’n afname in verkope weens mededinging binne Europa.
Volgens mnr. Francisco Climent wat Cleminules in Spanje verbou, het Suid-Afrika se lemoene markte tot einde November oorstroom, “sonder enige fitosanitêre beheer”. Hy sê Suid-Afrikaanse sitrus ding nou regstreeks met Spanje se sitrusseisoen mee wat in Oktober begin. Daarby het die land ook probleme met onverwagte reën en ’n afname in vraag uit Europa.
Volgens ’n berig in Fruitnet was afgevaardigdes van die Suid-Afrika se Departement van Landbou, Bosbou en Visserye en verskeie sitrusprodusente egter na ’n vergadering met die Europese Unie einde November hoogs ontevrede omdat die unie glad nie streng swartvlekregulasies wil verander nie.
Suid-Afrika bestee volgens die Buro vir Voedsel en Landboubeleid (BFAP) jaarliks R1,86 miljard aan voorkomende maatreëls teen swartvlek. Dit is nie volhoubaar nie. Die maatreëls vir plaagdoders is glo ook teenstrydig met ’n internasionale vraag na verminderde produksie van residu. Suid-Afrika het in 2018 nagenoeg 800 000 ton of 400 000 kartonhouers sitrus na Europa uitgevoer waarvan slegs twee besendings vir swartvleksimptome onderskep is.