Dié week in die landbou

VASBERADE

Suid-Afrika se sitrusbedryf het R1,86 miljard bestee aan maatreëls om swartvlek by sitrus te bekamp, volgens navorsing van die Buro vir Voedsel- en Landboubeleid. Mnr. Justin Chadwick, uitvoerende hoof van die Sitruskwekersvereniging van Suider-Afrika, sê in ’n meningstuk op die aanlyn koerant Daily Maverick dié onkoste plaas ’n onvolhoubare las op die plaaslike bedryf. Hy sê die redenasie van die Europese Unie dat sitrus ’n vektor is vir swartvlek na dié streek is gegrond op twyfelagtige wetenskap, en die bestrydingsmaat-

reëls daarteen is boonop teenstrydig met wêreldomgewingspraktyke. Lees die volledige artikel by bit. ly/2FiWZak.

PRYSDRUK

Veilingspryse vir speenkalwers in die Noord-Vrystaat het van Desember tot Januarie met meer as R3/kg lewende gewig gedaal. Volgens mnr. Chris Derksen van www.

vleisprys.co.za was die grootste daling in die prys van speenkalwers swaarder as 200 kg. Op die veiling van 8 Januarie vanjaar was dié prys R33,10/kg tot R3,95/kg laer as die R37,05/kg op die laaste veiling by Kroonstad op 11 Desember verlede jaar. Die prys van speenkalwers van 250 kg het op 8 Januarie met R3,65/kg tot R30,25/kg gedaal, en dié van speenkalwers minder as 250 kg met R3,61/kg tot R28,55/kg. Dercksen sê alle pryse was op die veiling onder druk hoofsaaklik weens die stygende mieliepryse, swak ekonomiese toestande en die onsekerheid oor hoe die uitbreking van bek-en-klouseer in Limpopo uitvoer gaan beïnvloed.

TE DROOG

Die landboumaatskappy Senwes het weens die benarde toestande in die somersaaigebiede ’n beoogde ekspo tot verdere kennisgewing uitgestel. Die ekspo sou op 29 en 30 Januarie by Nampopark aangebied word. “Ons vertrou dat u die voorrangoptrede rakende die huidige landboutoestande teenoor die behoefte om nou ’n ekspo aan te bied verstaan,” skryf mnr. Francois Strydom, uitvoerende hoof van Senwes, in die aankondiging. “Wees verseker dat die ekspo vir later gereël sal word en ons sal u vroegtydig dienooreenkomstig op ons gewone kanale en platforms in kennis stel. Dankie vir u begrip en mag die Vader ons almal binnekort ryklik met mildelike reën seën.”

BANKSKUIWE

Me. Konehali Gugushe, hoofamptenaar vir risiko by Land Bank, is as die bank se waarnemende finansiële hoof aangestel nadat mnr. Bennie van Rooy, finansiële hoof, op 7 Desember as tussentydse uitvoerende hoof aangestel is. Die bank sê in ’n aankondiging op die JSE-nuusdiens Gugushe werk sedert 2015 by die bank. Van haar risiko-verantwoordelikhede sal oorgedra word aan twee ander bestuurders – mnr. Sakhi Diza, hoofbestuurder van korporatiewe krediet, en me. Nafiza Khan, hoofbestuurder van ondernemingsrisiko. Mnr. T.P. Nchocho, uitvoerende hoof van Land Bank, is einde verlede jaar as die nuwe uitvoerende hoof van die Openbare Beleggingskorporasie aangestel.

VERLEP

Vier maatskappye wat snyblomme aan die kleinhandelgroep Shoprite in Gauteng verskaf, beweer die groep se eensklapse besluit om die voorwaardes van hul voorsieningsooreenkomste te verander kan tot 400 werksverliese lei. Die maatskappye sê in ’n prokureursbrief aan die winkelgroep die vier bloemiste het verhoudings van meer as tien jaar met die kleinhandelgroep. Business Day berig die eerste keer dat die bloemiste van enige probleme gehoor het, is ’n klagte van “swak en inkonsekwente aanbieding”, wat volgens die maatskappye ongegrond is. Shoprite het aan Business Day gesê hy grond sakepraktyke op “regverdigheid en integriteit”.

BOUMATERIAAL?

In Roemenië is ’n proses onderweg om isolasiemateriaal van skaapwol vir gebruik in nuwe geboue goed te keur. Die webpublikasie Romania

Insider berig drie maatskappye vervaardig wol-isolasiepanele van verskillende lengtes, dikte en digtheid vir gebruik in geboue. Die regering beoog om ook met die bouers van houthuise in Duitsland en België te vergader oor samewerking.