Traangasbom troef diewe
WAS dit nie vir ’n traangasbom en selfoon-alarm in sy reeds gepantserde pomphuis nie, was mnr. Rudi Engelke, ’n groenteboer by Kraaifontein buite Kaapstad, nou sy 22,5 kW-waterpomp en elektriese motor kwyt.
Tog is hy steeds R80 000 armer omdat die misdadigers ook ’n gat in die muur van die pomphuis gekap en die staalhek oopgeknip het. Hy moes gevolglik vier veiligheidswagte aanstel om die pomphuis twee dae lank op te pas sodat besproeiing kon voortgaan, omdat hy die twee dae ná die aanval niemand kon kry om die skade te herstel nie.
Engelke moes ook vir twee maande agt veiligheidswagte teen R10 000 per maand per wag aanstel om sy 25 ha aartappels op te pas.
“Ons kontant het opgeraak en ons moes die wagte laat gaan. Daardie aand is minstens drie ton aartappels deur nagenoeg 16 mans gesteel wat oor ons muur geklim het,” sê hy. Die aartappelprys was op daardie stadium ongeveer R8/kg, en gevolglik beloop dié verlies meer as R20 000.
MOORD
Vroeër die vakansie, op 16 Desember, is mnr. Nicolaas Strydom, ’n werker by die Kleinensorgen-boerdery van mnr. Johan Terblanche in Philippi op die Kaapse Vlakte, doodgeskiet nadat 12 mans die plaas aangeval en kontant geëis het.
Die gemeenskap kry tans selfverdedigingsopleiding, wat die hantering van vuurwapens insluit. Kinders en plaaswerkers word ook betrek.
Volgens mnr. Gunther Engelke, voorsitter van die Philippi-boerevereniging, laat die huidige situasie hulle geen ander keuse nie. “Die misdadigers word nie meer deur wetstoepassers afgeskrik nie. Hulle steel net wat hulle wil en respekteer geen grense of privaatheid nie. Politieke uitsprake wat verdeeldheid en onstabiliteit aanhits, help ook nie.”
STAAN EERDER SAAM
Gunther glo dié byna onhoudbare situasie kan verander indien alle gemeenskapslede saamstaan. Die verdeeldheid tussen rasse wat tans deur politieke leiers aangehits word, moet eerder tussen wetsgehoorsame burgers en misdadigers ingespan word, het hy tydens ’n gemeenskapsveiligheidsvergadering in Desember gesê. Mnr. Alan Winde, Wes-Kaapse minister van gemeenskapsveiligheid, het die vergadering bygewoon en onderneem om die Suid-Afrikaanse Polisiediens te nader om die aantal polisielede in Philippi te vermeerder en ’n satellietpolisiekantoor op te rig om sigbare polisiëring te verhoog.
Lt.kol. André Traut, WesKaapse polisiewoordvoerder, sê polisiebeamptes word volgens misdaadneigings en plaaslike behoeftes ontplooi. Opleiding in basiese selfverdediging en wat om in noodsituasies te doen, kan goed te pas kom en word aangemoedig.