GROOT OPTIMISME OOR OES NÁ DROOGTE
VRUGTEBOERE se vooruitsigte lyk vanjaar heelwat beter danksy broodnodige winterreën, maar die oes sal waarskynlik nie die rekordboeke herskryf nie.
Die bedryfsorganisasie Hortgro verwag ’n gemiddelde opbrengs vir die appel- en peerseisoen.
“Die vooruitsigte is oor die algemeen goed, en daar is genoeg water om ’n behoorlike oes te kan verwag,” sê me. Nina Viljoen, landbou-ekonoom by Hortgro, in ’n mediaverklaring.
Appelproduksie sal na verwagting met 5% toeneem, terwyl die peer-uitvoeroes dieselfde sal wees as verlede jaar.
Hoewel die droogte se oorslaaneffek nog sy ware kleure moet wys, is mnr. Jacques du Preez van Hortgro vol moed oor die seisoen se gehalte-vooruitsigte.
“Steenvrugte se suiker- en eet- gehalte is goed, en dit behoort dieselfde te wees vir appels en pere. Ons kleur is ook vanjaar uitstaande, danksy ’n meer gematigde rypwordingstydperk.”
APPELS EN PERE
Viljoen meen volumes van spesifieke appelkultivars sal vanjaar groei.
“Dis danksy jong boorde wat in produksie kom. Verlede jaar het baie van die jong boorde as teenvoeter gedien vir die droogte se enorme invloed.”
Die huidige weerstoestande is goed vir groei en kleurontwikkeling, en die vrugtebedryf hoop dit sal lei tot beter uitpakpersentasies vir Cripps Pink (Pink Lady) en Cripps Red (Joya) aan die appelkant. Die organisasie meen Golden Delicious, Royal Gala/Gala, Fuji en Topred/Starking sal ietwat minder appels as wat aanvanklik verwag is oplewer.
“Dis hoofsaaklik weens ’n ligter vrugset.”
Wat pere betref, lyk sake goed vir Forelle, Vermont Beauty, Rosemarie en Flamingo.
’n Hittegolf in Oktober was slegte nuus vir Packham’s Triumphbome, wat toe in volblom gestaan het. Die uitvoervolume sal waarskynlik gelykstaande wees aan verlede jaar se 5,62 miljoen kartonhouers. Boere sal na verwagting ook sowat 7% minder Williams Bon Chrétien oes, weens kleiner vruggroottes.
Die hektare onder peerboorde was die afgelope paar jaar bestendig.
“Hoewel uitvoer van Packham’s Triumph en Forelle steeds toeneem, het die aanplantings die afgelope twee tot drie seisoene gestabiliseer. Produsente vervang ouer en marginale boorde,” verduidelik Viljoen.
Du Preez verwag dat produksie sal bly groei.
“Marginale boorde word met hoëdigtheid-boorde vervang, wat beter dra en beter uitpakpersentasies oplewer.”
GELEENTHEDE
Vir appel- en peerboere van Ceres en die EGVV-gebiede (Elgin, Grabouw, Vyeboom en Villiersdorp) lyk sake vanjaar heelwat beter as verlede jaar.
“In die Langkloof is daar egter ’n vraagteken oor hoe lank die water gaan hou. Dit kan beslis ’n invloed op die oesskatting hê. Wat steenvrugte betref, knor dit nog lelik in die Klein-Karoo op plekke soos Ladismith en Barrydale.”
Du Preez sê die Noordelike Halfrond het ook verlede jaar ’n kleiner appeloes ingesamel, wat goeie geleenthede vir Suid-Afrikaners in Brittanje geskep het.
“Vanjaar is die Noordelike Halfrond egter terug met ’n bogemiddelde oes, dus moet produsente besef dit gaan taai wees op die Europese mark.”
Du Preez sê peerboere sal slim moet wees met bemarking, want Europa is steeds die bedryf se grootste uitvoermark.
“Wees versigtig om te veel klein vrugte te pak,” maan hy.
Die Suidelike Halfrond se oesskatting word tydens Fruit Logistica (6-8 Februarie) in Berlyn gedoen. –