‘Sluikhandel kan 10 000 hul werk kos’
’N NUWE bedryfsorganisasie, die Organisasie vir Swart Tabakprodusente (BTFA), het op die dag van sy ontstaan onmiddellike regeringsoptrede geëis om die sluikhandel in onwettige sigarette stop te sit.
Mnr. Shadrack Sibisi, voorsitter van dié nuwe tabakprodusente-organisasie vir opkomende boere, wat tans uit 155 lede bestaan, het gesê 10 000 werkgeleenthede kan verlore gaan weens die gebrek aan daadwerklike optrede teen onwettige sigarethandel.
Buiten miljarde rande se belastingverliese, stel die sluikhandel ook die voortbestaan van die plaaslike bedryf in gevaar omdat die onwettige bedryf ingevoerde tabak gebruik.
Hy verwys na Limpopo Tobacco Processors (LTP), die grootste aankoper en verwerker van Suid-Afrikaanse tabak, wat onlangs gewaarsku het hy sal sy deure moet sluit tensy die onwettige handel stopgesit word.
BEDREIGING
Mnr. Christo van Staden, hoofbestuurder van LTP, sê dat selfs met huidige aanvraagsvlakke gaan die verlies aan skaalekonomie dit vir LTP moeilik maak om volhoubaar te bly. “(Onwettige sigarethandel) is ’n direkte bedreiging vir alle tabakboere, insluitend swart opkomende boere, op presies die tydstip waar hulle probeer om te groei, te diversifiseer en hul toekoms te verseker.”
Sibisi sê ondanks verskeie regeringsbeloftes het hy nog min optrede gesien.
“Ons kan nie langer vir optrede wag nie. Indien die ministers in hierdie Regering nie dié rowery kan stopsit nie, moet hulle na Limpopo en ander provinsies gaan om aan 10 000 Suid-Afrikaners te verduidelik waarom hulle gewillig is om gesinne en gemeenskappe uit te wis,” sê hy.
Die BTFA dring ook aan dat die Regering nie die prys van wettige sigarette verhoog voordat hy die onbetaalde belasting op onwettige sigarette ingevorder het nie. “Die Regering het hierdie probleem geskep, en die Regering moet dit oplos,” sê Sibisi.
GEEN STEUN
Sibisi sê slegs British American Tobacco ondersteun tans die BTFA. “Ons lede wil nie vir altyd kleinboere bly nie. Ons benodig ondersteuning van regeringskant én die privaatsektor om ons in staat te stel om na die volgende vlak te groei om sodoende meer werksgeleenthede te skep en ons gemeenskappe te ontwikkel,” sê hy.