Herlewing van tekstielbedryf goeie nuus vir katoenboere

’N TEKSTIELMAATSKAPPY wat binne vier maande 450 werkgeleenthede kon skep, het ’n inspuiting van miljoene rand van die Regering gekry.

’n Herlewing van die tekstielbedryf deur die staat se swart nyweraarsprojek is goeie nuus vir boere wat katoen en ander grondstowwe produseer, want die meeste grondstowwe moet plaaslik bekom word.

Africa Bespoke Apparel is die jongste tekstielmaatskappy in KwaZulu-Natal aan wie die Departement van Handel en Nywerheid ’n geldelike inspuiting van R35,5 miljoen toegestaan het. Verdere finansiering vir die projek kom van die provinsiale groeifonds.

Mnr. Sidwell Medupe, woord-

voerder van die departement, sê die maatskappy bekom 60% van sy grondstowwe plaaslik en die res kom van China.

Die maatskappy sal nou die vermoë hê om sy produksie te verdriedubbel, omdat die geld gebruik sal word om nuwe toerusting aan te skaf, sê mnr. Bulelani Magwanishe, Adjunkminister van Handel en Nywerheid. Met die ondersteuning van die nyweraarsprojek beoog die maatskappy om verskeie markte in Afrika suid van die Sahara te betree.

Mnr. Sihle Zikalala, LUR vir ekonomiese ontwikkeling, toerisme en omgewingsake in KwaZulu-Natal, sê die klereen tekstielbedryf se vermoë om werk te skep, is een van die redes waarom dit as ’n voorkeurbedryf geïdentifiseer is.

“Sektore soos die landbou, vervaardiging, toerisme en logistiek het die groei van ons provinsiale ekonomie laat uitskiet. Ons moet dus voortgaan om in projekte en infrastruktuur te belê wat dit makliker maak om besigheid te doen, en die koste van bedrywighede binne hierdie sektore verlaag.”