Eerste stap om sluimerende tribunaal aan die gang te kry

DAAR is hoop dat van die honderde sake wat by die watertribunaal sloer, moontlik vanjaar aandag sal kry nadat die tribunaal weer sleutelposte by dié liggaam adverteer.

Mnr. Gugile Nkwinti, Minister van Water en Sanitasie, vra in die Staatskoerant vir benoemings vir ’n voorsitter, adjunkvoorsitter en bykomende lede vir die watertribunaal. Benoemings sluit op 25 Februarie 2019.

Die tribunaal, waar boere kan appelleer teen besluite van die Departement van Water en Sanitasie, is sedert verlede April sonder ’n voorsitter, wat beteken dit kan nie wettig funksioneer nie. Boere kan hulle na die Hooggeregshof wend wanneer hulle ontevrede is met ’n besluit, maar dit het koste-implikasies.

OORDRAGTE

Mnr. Robert Mabe, registrateur van die tribunaal, sê die tribunaal het 594 sake ontvang, wat appèlle van die landbousektor insluit. Die meeste sake gaan oor die oordrag van waterregte van een plaas na ’n ander. Talle sake gaan oor die gebruik van meer water as die kwota wat aan ’n watergebruiker toegeken is.

Sedert begin verlede jaar kon boere nie meer gebruik maak van ’n bestaande en toelaatbare praktyk waar besproeiingsrade goedkeuring verleen het om waterregte van een plaas na ’n ander oor te dra nie. Dit het gevolg nadat die Departement van Water en Sanitasie besluit het besproeiingsrade is nie by magte om so ’n besluit te neem nie.

Mabe kon nie sê hoeveel sake spesifiek op die landbou betrekking het nie, aangesien almal in dieselfde register aangeteken word. Dit het egter geblyk die meeste van dié sake het op die landbou betrekking.