Bek-en-klouseer kan jare se werk ongedaan maak

WERKVERLIESE kan volg ná die opheffing van Suid-Afrika se status as vry van bek-en-klouseer en die gevolglike uitvoerverbod.

Dié waarskuwing kom van mnr. Matthew Karan, direkteur van Karan Beef, een van Afrika se grootste beesvoerkrale en een van die land se grootste uitvoerders van rooivleis.

Dit volg ná twee beeste in die distrik Vhembe positief getoets is vir dié virussiekte. Die siekte hou geen gevaar in vir mense nie, maar versprei vinnig onder beeste en ander diere met gesplete kloue.

Karan sê ’n groot persentasie van uitvoervleis word ontbeen. “Weens die verhoogde vraag uit die buiteland is meer aanlegte opgerig waar vleis ontbeen word, maar as uitvoerders nie hierdie vleis kan uitvoer nie, sal werkgeleenthede onvermydelik verminder word.”

Die maatskappy voer reeds die afgelope twee dekades vleis na die Midde-Ooste uit. Hy het in 2017 marktoegang tot China verkry, wat daartoe gelei het dat sy uitvoervolume verdubbel het.

VYF JAAR

Karan sê dit kan tot vyf jaar duur voor ’n Suid-Afrikaanse vleisuitvoerder die vertroue van ’n buitelandse mark wen.

“Ons het in die Midde-Ooste gesien hoe baie werk dit verg om kopers wat skepties is oor vleis uit Afrika te oortuig van ons gehalte.

“Die geïsoleerde uitbreking van bek-en-klouseer in die verre noorde van Suid-Afrika beteken

ons moet nou weer van voor af ons markte gerusstel oor ons puik produk.”

Die Department van Landbou, Bosbou en Visserye het self die uitvoer van Suid-Afrikaanse vleis stopgesit en reik nie enige gesondheidspermitte uit nie, sê Karan. Hy waarsku dat die prys van speenkalwers onvermydelik sal val.

“Die plaaslike vraag is nie watwonders nie en dit was die uitvoermark wat die rooivleisekonomie aan die gang gehou het. As ons geruime tyd lank nie kan uitvoer nie, sal die prys onvermydelik daal en sal minder beeste geslag word.”