BEDRYF SOEK SIGOREIBOERE
Die Suid-Afrikaanse sigoreibedryf, wat grootliks in die omgewing van Alexandria in die Oos-Kaap gesentreer is, lewer tans gemiddeld 13 000 ton tot 14 000 ton nat wortels per jaar, maar die Suid-Afrikaanse verbruik beloop sowat 20 000 ton per jaar. Die tekort word aangevul met invoer uit Indië.
“Daarom soek ons meer boere wat dit onder besproeiing kan verbou,” sê mnr. Craig Elliott van Sigorei SA op Alexandria.
“Ons gee daarom ook heelwat aandag daaraan om biologiese sigoreiboerderypraktyke te ontwikkel,” sê hy.
Tot sowat 12 jaar gelede was daar sowat 100 sigoreiboere bedrywig, maar die getal het drasties afgeneem tot minder as ’n kwart daarvan weens probleme met minimumloonwetgewing en verblyfregkwessies. Talle kleiner sigoreiboere het bloot opgehou boer, want sigoreiproduksie is baie arbeidsintensief, en hulle het genoeg gehad van arbeidsprobleme.
Elliott sê die plaaslike vraag styg geleidelik, maar produksie is geknel deur die ernstige droogte van die afgelope drie jaar in die produksiegebiede. Sigorei word ook by Hanky, Patensie, in die Visriviervallei naby Somerset-Oos en by Cradock verbou.
Suid-Afrikaanse sigorei is van puik gehalte en vergelyk goed met dié van die groot produksielande, waaronder Frankryk, België en Indië.
Hoewel geen regstreekse sigoreinavorsing in Suid-Afrika gedoen word nie, word verskeie buitelandse kultivars wel deur Sigorei SA op Alexandria geëvalueer. “Die belangrikste kultivar wat plaaslik aangeplant word, is Orchies, ’n Franse kultivar. Die huidige produsenteprys vir sigorei is R1 900/ton, wat ’n taamlike styging is van die R1 200/ ton sowat vier jaar gelede (2015).”