Meer vennote vir Seil-Safari
Laeveld Agrochem span vanjaar sy seile saam met Toyota SA en VKB Landbou vir die Seil-Safari. ’n Landboukonferensie en hope gesinsvermaak word van 1 tot 5 April op die MSC Musica aangebied. Dié retoer-bootreis is van Durban af na Pomene in Mosambiek.
Laeveld Agrochem wou ’n spesiale geleentheid vir produsente skep om kennis in te win op ’n opwindende manier. Só het die idee vir die Landbouboot ontstaan. Buiten dat waardevolle kennis uitgeruil word, is ’n groot pluspunt dat boere die geleentheid sal kry vir informele gesprekke met kenners.
Die komende nasionale verkiesing, 25 jaar ná die eerste demokratiese verkiesing in 1994, gaan die Suid-Afrikaanse ekonomiese en politieke terreine noemenswaardig beïnvloed. Kritieke sake, soos grondonteiening sonder vergoeding, moontlike inmenging by die Reserwebank, korrupsie en gevaarligte wat oor pensioenfondse flikker, sal regstreeks geraak word deur die magspolitiek wat oor die volgende maande gaan uitspeel.
Mnr. Theo Vorster, uitvoerende hoof van Galileo Capital, en mnr. Theo Venter, politieke ontleder verbonde aan die Noordwes-Universiteit se sakeskool, gaan verskillende situasies bespreek wat in 2020 en later op Suid-Afrika kan wag.
Prof. Johan Willemse, ’n landbou-ekonoom, gaan oor landbousakeplanne praat.
Mnr. Todd Cardwell, ’n landboukenner van Amerika, gaan ’n voorlegging doen oor hulpmiddels, toedieningstegnologie en nuwe ontwikkelings in gewasbeskerming.
Nog onderwerpe sluit in intelligente sekuriteitstegnologie en plaasveiligheid, graanverskansing op Safex, geïntegreerde plaagbestuur, volhoubare landbou met die klem op holistiese benaderings, en arbeidsbestuur.
Laeveld Agrochem en Agri Technovation is sinoniem met moderne tegnologie wat boere beter toerus om variasie te bestuur. Daar sal verskeie aanbiedinge wees oor hoe tegnologie en dienste, soos grond-, blaar- en waterontledings en plaagmonitering, boere kan help om beter besluite te neem.
Nog sprekers sluit in dr. Theo de Jager, wat gaan praat oor moontlikhede in die res van Afrika vir Suid-Afrikaanse boere, en prof. Ferdi Meyer van BFAP.
GESINSFEES
Agter elke suksesvolle boer staan ’n sterk vrou en daarom is die Seil-Safari ideaal vir die hele gesin. Boere en hul gesinne sal tyd kry om te ontspan en hul batterye te herlaai met behulp van motiveringsprekers soos me. Lynette Beer, bekend om haar persoonlikheidsontledings, en mnr. Timothy Kieswetter, ’n bekende spreker oor ’n gesonde sekslewe vir paartjies.
Die aktrise Donnalee Roberts gaan een van die vrouesessies lei, waarby verrassings ingesluit is.
Absa en die Pinotage-vereniging, met legendariese handelsmerke soos Kanonkop en Beyerskloof, gaan ’n spesiale wynproesessie aanbied.
Daar is ook vermaak en optredes deur van Suid-Afrika se beste kunstenaars, soos Andries Vermeulen, Bok van Blerk en sy orkes, Elvis Blue, Monique Steyn en Touch of Class. Maak reg om behoorlik te langarm!
Vir die jongspan is daar MSC se vermaakprogram vir kinders, en sport- en ontspanningsessies.
TOYOTA
Produsente kan hul Agribonuspunte gebruik om vir die reis te betaal. Indien jy ’n Toyota-voertuig gekoop het, of beoog om binnekort een te koop, behoort jy baie punte te hê om vir jou reiskoste te gebruik. Kontak Agribonus vir nog inligting.
Die BTW-verhalingsadviesdiens Tax Recoveries sal jou kan wys hoe om nog meer reisgeld te verhaal. Besoek www.
taxrecoveries.co.za vir inligting.
VKB LANDBOU
VKB Landbou, een van Seil-Safari se nuwe vennote, is ’n landboumaatskappy wat toegespits is op die optimalisering van produsente se finansiële posisie deur die voorsiening van insette, die hantering en opberging van graan, en die bemarking van die produkte. Dié maatskappy vier in 2019 sy 100ste bestaansjaar, en ter viering van dié trotse gebeurtenis kry VKB-lede ’n borgskap teen hulle kajuitkoste.
Kontak jou naaste VKB-tak vir inligting oor die lede-afslag.
REIS SAAM!
Enkele binnekajuite is beskikbaar vanaf R5 800 per persoon wat deel, plus hawebelasting van R1 235 per persoon. Kinders wat ’n kajuit met twee volwassenes deel, reis gratis met slegs ’n hawebelastingheffing van R800.
Die kajuite met ’n see-uitsig is reeds uitverkoop, maar balkonkajuite met ’n see-uitsig is nog beskikbaar. Alle etes en vermaak is by die kajuitkoste ingesluit, maar drankies is uitgesluit.
Kry jou paspoort gereed en bespreek nou vir een van daardie geleenthede waaroor jy en jou gesin nog lank gaan praat!