R450 000/ha: Blospeer tref uitvoermark
Die Europese blospeerkultivar Celina – op die mark bekend as Qtee – wys reeds in sy tweede kommersiële seisoen sy ware kleure, en dit beloof om ’n hoëwaardepeer met ’n uitstekende opbrengs te wees.
Pogings om die regte knoppies op die uitvoermark so vroeg as moontlik te druk, het pas stukrag gekry met die Europese blospeerkultivar Celina. Blospere kan in Suid-Afrika reeds in week twee geoes word danksy die Celina-kultivar, wat as Qtee bemark word. Forelle, die vlagskip- Suid-Afrikaanse blospeer, word eers teen die week vier geoes en Qtee sorg dus dat Suid-Afrika nóg vroeër die uitvoermark met gesogte blospere kan betree. Omdat dit so vroeg geoes kan word, sal Qtee die peeraanbod uit Suid-Afrika op die Europese en Asiatiese mark goed aanvul, pleks daarvan om met ander kultivars mee te ding. Volgens mnr. Nikko Maree, verteenwoor- diger van die Stargrow-kwekery se kernvrugafdeling, het die 120 ton Qtee-pere wat Suid-Afrika verlede jaar hoofsaaklik na die Brittanje en Europa uitgevoer het, meer as R9 000/t op die plaas verdien.
Hoewel die peer tot vyf maande opgeberg kan word, is dit nie wat Stargrow, die uitvoerder en kwekery wat die kultivar in Suid-Afrika bestuur, in gedagte het nie. “Die huidige oogmerk van die kultivareienaar is om eerstens die gehalte van die kultivar by verbruikers te vestig. Dis ’n mooi en smaaklike peer wat byna soos Bon Chrétien-pere smaak. Die uiteindelike doel is om die pere so lank as moontlik teen die bes moontlike gehalte beskikbaar te hê,” verduidelik Maree.
Nóg ’n groot voordeel van dié kultivar is sy vermoë om sy uitstekende kleur te behou selfs in warmer temperature, wat ge-
woonlik veroorsaak dat ander blospere hul kleur verloor.
60 T/HA MOONTLIK
Mnr. Bernard du Toit, voormalige nasionale Boer van die Jaar, het een van die eerste kommersiële aanplantings van Celina in Suid-Afrika op sy plaas Langrivier in die Koue-Bokkeveld. Volgens mnr. L.J. Fabricius, plaasbestuurder, sal ’n oes kleiner as 60 t/ha op ’n voldraende Celina-boord ’n teleurstelling wees.
“Ons verwag vanjaar minstens 25 t/ha op ’n vierdebladboom. Op geen ander peer het ons al sulke goeie opbrengste op sulke jong bome gehad nie.”
Dit strook met die opbrengs van mnr. Kris Wouters van België wat ook met pere boer en ’n gemiddelde van 60 t/ha met Celina behaal het.
Mnr. Andries van der Westhuizen, bemarkingsbestuurder van Stargrow, waarsku egter dat dié kultivar geneig is tot vertraagde groei indien die boom te vinnig te swaar gelaai word met vrugte. “Indien jy eers die spasie vul voordat die oes te groot gemaak word, behoort jy nie ’n probleem te hê nie.”
Fabricius se vooruitsig vir ’n hoë tonnemaat op dié kultivar is gegrond op die huidige oes wat steeds pragtig lyk ná ’n uitdunspuit en handuitdunning, waar elke tweede tros wat geset het, verwyder is.
“Die vrugte vergroot mooi en dáárom die groot oes. Ons het kerfies bo dormante ogies gemaak om nuwe breuke te kry waar kaal plekke op die stam was, maar nie méér as wat normaal is vir pere nie. Tydens die droogte
verlede jaar het ons die bome effens laat swaarkry, wat die groei effens belemmer het, maar vanjaar lyk die groei goed. Die mooi oes wat hier sit, maak dat ek nie bekommerd is oor volgende jaar se oes nie.”
Op Langrivier-boerdery is Celina op C51-kweperonderstamme en BP1-peeronderstamme geplant. Volgens Du Toit is die vrugte ooglopend groter op die C51-onderstamme, terwyl daar geen verskil in groeikragtigheid tussen die twee verskillende onderstamme op sy plaas is nie. Al die bome is vir ’n maand teen 3 °C in die koelkamer
gehou, voor dit aan die einde van Oktober 2015 geplant is.
Die bome is teen ’n spasiëring van 3,5 m x 1,5 m geplant en kry 300 m3 besproeiing per hektaar per week deur drupperlyne. Die lewering is 2,3 liter per uur per drupper en die druppers is 600 mm van mekaar gespasieer.
Die boorde sal vanjaar 200 kg stikstof, 20 kg fosfaat en 100 kg kalium per hektaar deur die besproeiing kry.