AfriForum wil weer buiteland betrek in stryd teen plaasmoorde
’N PLAASVEILIGHEIDSOUDIT, meer bewusmakingsveldtogte in die buiteland en ’n voorlegging in die Parlement is deel van AfriForum se verskerpte veldtog teen plaasmoorde in die komende jaar.
Mnr. Ernst Roets, adjunk- uitvoerende hoof van AfriForum, het die burgerregte-organisasie se aksieplan in Pretoria bekend gestel. Hy het by die geleentheid gesê hoewel daar in 2018 ’n afname in plaasmoorde was, het plaasaanvalle skerp gestyg. ’n Ontleding deur AfriForum se gemeenskapsveiligheidsafdeling het bevind dat daar in 2018 sowat 433 plaasaanvalle en 54 plaasmoorde was.
In 2017 was daar 72 moorde en 342 aanvalle (91 minder). AfriForum sê dit dui daarop dat, hoewel die probleem vererger, mense beter omsien na hul veiligheid en nie wag om vermoor te word nie. “Die plaasgemeenskap is meer voorbereid en baklei terug. Gevolglik is daar ’n afname in moorde.”
In 2018 het gemiddeld 1,04 moorde per week en 1,2 aanvalle per dag plaasgevind. Die meeste aanvalle was gedurende Februarie, toe 45 mense aangeval is. Volgens die ontleding is daar telkens gemiddeld drie aanvallers betrokke.
Plaaswerkers word deur een uit elke tien aanvalle geraak, of hulle is self die teiken van die aanval.
VEILIGHEIDSOUDIT
Op plaaslike vlak wil AfriForum veiligheidstrukture versterk deur beter kommunikasieprosesse en opleiding te vestig. “Ons wil ’n plaasveiligheidsoudit onder AfriForum se lede doen om vas te stel wat die risiko’s is en wat daaraan gedoen kan word,” het Roets gesê.
Die nasionale aksieplan behels ’n voorlegging in die Parlement oor die impak van plaasmoorde en stappe wat die Regering kan doen. Met die Wilmien Potgieter-fonds wat op 1 Februarie van stapel gestuur is, wil AfriForum kinders wie se lewe deur plaasaanvalle geraak is, geldelik bystaan.
Die Potgieter-gesin – Attie, sy vrou, Wilna, en hul tweejarige dogter, Wilmien – is in 2010 wreed op hul plaas naby Lindley in die Vrystaat vermoor. “Ons wil kinders help met skool- en universiteitsgeld. As daar genoeg geld ingesamel word, sal ons ook help met traumaberading,” het Roets gesê.
’n Opvolgskakeltoer na Amerika word vir April beoog as deel van AfriForum se internasionale aksie. Pres. Donald Trump van Amerika het onlangs wetgewing onderteken wat daarop gemik is om volksmoorde en wandade te voorkom. AfriForum gaan dit bestudeer om te kyk hoe dit gebruik kan word in die stryd teen plaasmoorde.
DRUK OP REGERING
’n Opvolgtoer na Australië en besoeke aan ander lande word ook beoog. “Ons wil bewustheid kweek en steun werf, sodat druk op die Suid-Afrikaanse Regering uitgeoefen kan word om in te gryp,” het Roets gesê.
Mnr. Ian Cameron, hoof van gemeenskapsveiligheid by AfriForum, het gesê die Regering probeer die erns van die probleem onderbeklemtoon.
Roets het ontken dat AfriForum aan die wêreld verkondig dat daar ’n wit volksmoord in Suid-Afrika is. “Dit beteken egter nie hier is nie ’n ernstige krisis nie. Plaasaanvalle is uniek weens die gereelde voorkoms daarvan, die gewelddadigheid wat daarmee gepaardgaan, die rol wat die landbou plaaslik speel om werk te skep en voedselsekerheid te verseker, asook die feit dat boere ver van die polisie en hul bure woon.”
DATA-INSAMELING
Landbouweekblad het verlede maand berig dat TLU SA 382 plaasaanvalle en 53 moorde op plase in 2018 aangeteken het, teenoor 423 aanvalle en 80 moorde in 2017.
Cameron het by navraag gesê AfriForum se syfers verskil hiervan, omdat elke organisasie sy eie stelsel en infrastruktuur gebruik om data in te samel. AfriForum ontvang inligting van sy lede, en elke aangemelde voorval word by die polisie bevestig.
Genl. Chris van Zyl, adjunkhoofbestuurder van TLU SA, sê die aanvalsyfer verskil omdat dit ingewikkelder is om die statistieke by te hou weens die baie grys gebiede, soos kleinhoewes en wildsplase. TLU SA se jongste syfers is 54 moorde en 394 aanvalle in 2018.
–