Só vorder aansoeke vir rampverklarings

HOEWEL die Departement van Samewerkende Regering kort voor druktyd aangedui het dat geen aansoeke om rampstatus van munisipaliteite of provinsies nog ontvang is of tans hangende is nie, bearbei die georganiseerde landbou in die Vrystaat, Noordwes en die Noord-Kaap tans owerhede in dié verband.

’n Rampverklaring maak dit moontlik vir bykomende staatsgeld om deur middel van munisipale, provinsiale of nasionale owerhede aan boere beskikbaar gestel te word.

Boere in die Vrystaat word aangemoedig om by hul plaasli- ke landbouvoorligtingsbeamptes aansoek te doen om droogtehulp van die staat nadat Vrystaat Landbou verlede week ingelig is dat die nodige vorms by dié beamptes beskikbaar is.

Dit volg ná die Vrystaatse departement van landbou gereageer het op ’n brief wat dr. Roy Jankielsohn, Vrystaatse DA-leier, tot die provinsiale owerheid gerig het om die provinsie tot ’n rampgebied te laat verklaar.

SPERTYD

Dr. Jack Armour, bedryfsbestuurder van Vrystaat Landbou, en mnr. Gerhard Kriel, uitvoe- rende hoof, het reeds op 14 September verlede jaar ’n brief aan dr. Bennie Molokoane, Vrystaatse LUR vir landbou, en mnr. Markus Butler, direkteur van die Vrystaatse rampbestuursentrum, gestuur om bystand vir hulpbehoewende boere in veral die Wes-Vrystaat te versoek.

Armour sê die nodige vorms moet teen 15 Februarie by die voorligtingsbeamptes ingehandig wees. Die toedrag van sake sal op ’n vergadering einde Februarie bespreek word.

Intussen gaan prosesse vir droogtehulp in die Noord-Kaap en Noordwes voort.

Volgens Agri Noord-Kaap het talle munisipaliteite stappe gedoen om tot rampgebiede verklaar te word. Mnr. Naudé Pienaar, assistent-hoofbestuurder van Agri Noordwes, sê sy organi-

sasie is besig met samesprekings met die departement van landbou in Noordwes en die provinsiale rampbestuursentrum.

Boere wat nog inligting oor die droogtehulpvorms in die Vrystaat benodig, kan die organisasie bel by tel. 051 444 4609.