Dié week in die landbou
EINDELIK, REËN!
Reën het verlede week oor verskeie droogtegeteisterde dele van die land uitgesak. By Tarkastad (bo) het 50 mm binne ’n paar uur geval. Ongelukkig was die reën in baie gevalle uiters gelokaliseerd, met neerslae wat van stofnat tot 30 mm gewissel het in die distrik Hertzogville in die Vrystaat. Van die plekke wat teen druktyd (30 Januarie) redelike reën gekry het, was Bloemhof in Noordwes (41 mm), Cradock en Queenstown in die Oos-Kaap (onderskeidelik 28 mm en 26 mm), De Aar en Kuruman in die Noord-Kaap (17 mm elk) en Bloemfontein (16 mm).