Boerekos: ’n Mond vol soet
Gemmertruffels
Hierdie truffels is heerlik ryk sonder om oormatig soet te wees.
■ 375 ml grof gebreekte gemmerkoekies, plus 5 ekstra koekies
■ Halwe houer (ongeveer 110 g) roomkaas
■ 5 ml vanieljegeursel
■ 200 g witsjokolade, fyn gekap
Verwerk die 375 ml gebreekte gemmerkoekies in ’n voedselverwerker tot fyn krummels. Voeg die roomkaas en vanieljegeursel by en verwerk verder tot ’n gladde mengsel. Skep uit in ’n bakkie, bedek lugdig en verkoel vir minstens 2 uur. Skep opgehoopte teelepels vol van die mengsel uit en rol in balletjies. Pak die balletjies op ’n bakplaat en verkoel tot yskoud of vries tot hard.
Druk die vyf ekstra gemmerkoekies met ’n rolstok fyn en gooi die krummels in ’n bakkie.
Smelt die witsjokolade oor lae hitte tot glad. Gebruik ’n tandestokkie om die gemmertruffels in die gesmelte sjokolade te doop. Skud die oortollige sjokolade liggies af en sprinkel ’n klein bietjie gemmerkoekiekrummels oor elke truffel. Sit die truffels op ’n bakplaat wat met bakpapier uitgevoer is en laat staan tot die sjokolade hard is.
Verkoel tot benodig. Lewer 15 truffels.