Markte
’n Kleiner as verwagte Suid-Afrikaanse grondboonoes kan ’n gaping vir kettingwinkelgroepe laat om groter hoeveelhede goedkoop grondboonbotter uit Indië in te voer.
Dít is een van die probleme wat plaaslike boere en verwerkers vanjaar in die gesig staar, sê mnr. Alfonso Visser, uitvoerende hoof van die Golden Peanut & Tree Nut Company.
“Indië se grondboonprys is die laagste ter wêreld. Dit kan die broodnodige styging in die plaaslike prys kniehalter.”
Die droogte en laat reën het grondboonaanplantings in die somer geknou. Die gewas is gevoelig vir ongunstige klimaat. “Die afname in grondboonaanplantings weens die laat reënval was die grootste in die Vrystaat. Daar is minder as 20% van die normale aanplantings gedoen – veral by Bultfontein en Hoopstad,” sê Visser.
Oos van Viljoenskroon het dit effens beter gegaan.
Noordwes se aanplanting is ook minder as 30% van die voorneme en langtermyngemiddelde, sê Visser.
Die Oesskattingskomitee het verlede Oktober berig dat die aanplantings van grondbone met 11,2%, of 6 300 ha, kan afneem – van 56 300 ha tot 50 000 ha. Dié aantal hektare kan weens die ongunstige klimaatstoestande nog minder wees.
Visser sê die droëlandgrondbone ontwikkel baie stadiger weens die temperatuur wat bo 36 °C is en die min grondvog.
“Vanjaar is ons dankbaar dat daar wel besproeiingsaanplantings van grondbone is waar die grootste persentasie saadvermeerdering gedoen is om te verseker dat daar genoeg saad vir 2019-’20 is.”