Veilingsverslae
Goeie teelmateriaal behaal altyd hoë pryse, sê dr. Cobus Oberholster, hoofbestuurder van vee, eiendomme en afslaers by BKB. “Die eeue oue gebruik van gehalte lewer dividende. Goeie ramme behaal hoë pryse, terwyl middelmatige diere laer pryse behaal.”
Oberholster het BKB se openingsveiling van sy nuwe seisoen by die Merinostoetery Hartebeesfontein van mnr. Izak Nel en Seuns van Rouxville as ’n teksboekgeval beskryf. Die duurste ram op dié eerste produksieveiling van Hartebeesfontein het R75 000 behaal. BKB bied sowat 3 000 ramme op verskillende veilings oor die volgende ses weke aan.
“Die feit dat dit nog oor ’n wye gebied droog is, kan die pryse van stoetdiere sywaarts dwing teen die agtergrond van ’n daling in die lamen speenkalfprys,” sê hy.
Volgens Oberholster is die kleinveebedryf steeds in ’n kuddeboufase, maar ’n verlangsaming van die prysstyging vir stoetdiere beteken dat die hoë pryse van die vorige jaar nie nou herhaal sal word nie.
Een van die faktore wat pryse sal laer druk, is die voorkoms van bek-en-klouseer en swakker verkoopsyfers in die kleinhandel verlede Desember.