Nuttig en nuut
Vandag se kalwers is môre se hoogs produktiewe koeie, glo DeLaval, die Sweedse vervaardiger van toerusting vir die melkbedryf. Met sy nuwe outomatiese CF1000-melkkroeg vir tot 120 kalwers wat by vier suippunte gevoer kan word, word die boer se taak vergemaklik en ’n kostebesparing met arbeid en veeartsbehandeling teweeggebring.
Mnr. Mike Mouton van DeLaval sê minder melk word op dié manier vermors omdat die toestel die melk volgens die behoefte van elke individuele kalf berei en toedien.
Die kalf se verbruik van melk en kalfmeelkonsentraat word deur die masjien gemonitor en die speenproses kan gemanipuleer word. Die outomatiese vermenging en verspreiding van die kalfrantsoen en die outomatiese skoonmaakproses verminder die arbeidskoste.
Die intensiewe voedings- en speenprogram dra daartoe by dat die kalwers vinnig behoorlik uitgroei, en dat die teler die inname, drinkspoed en besoeke aan die suippunt van elke kalf kan monitor.
Danksy die beheerde voedingstoestande is daar ’n verlaagde risiko vir diarree en asemhalingsprobleme, omdat melkinname oor 24 uur plaasvind en die voeding voortdurend teen die gewenste temperatuur berei word. PRYS: Op aanvraag.
NAVRAE: Webwerf: www.delaval. com; Mike Mouton, e-pos: mike.mouton@delaval.com, sel 082 652 1450.